Gjatë ditës së djeshme Policia e Kosovës me një aksion të befasishëm ka kapur në flagrancë një grup personash të cilët po përgatiteshin të organizonin gara ilegale me vetura në Autostradën Ibragim Rugova në Prizren.
Policia gjatë këtij aksioni i ka ndaluar 5 persona të cilët janë kapur duke organizuar gara dhe bixhoz për gara dhe ua ka konfiskuar veturat luksoze ku bashkë me shoferët janë dërguar në stacion policor në Prizren për procedura të mëtutjeshme. Gjithashtu ndaj të gjithëve janë shqiptuar gjoba prej 150 euro dhe 1 pikë negative.
KosovaNews ka kontaktuar me zëdhënësin e policisë në rajonin e Prizrenit Vesel Gashin i cili ka konfirmuar këtë aksion: “Po dje policia pas marrjës së disa informatave ka kapur në flagrancë 5 persona të cilët po përgaditeshin të bënin gara me makina. Ngjarja ka ndodhur në dy parkingje të karburanteve në hyrje dalje të Autostradës Ibrahim Rugova dalja në veri të Prizrenit. Ndaj të gjithëve janë shqiptuar gjoba në bazë të nenit 54 pragrafi 4 prej 150 euro dhe nje 1 pikë negative. Policia ka konfiskuar veturat dhe i ka dërguar në Njesinë e Trafikut Rajonal në Prizren për procedura të mëtutjeshmë ku janë dërguar për kontrollim teknik për të parë nëse këto vetura janë të modifikuara dhe nëse kanë paisje shtesë jashtë standarteve” ka thënë Gashi për KosovaNews.
Më tutje Gashi ka thënë se shoferët e veturave janë dërguar në stacion për procedura të mëtutjeshme ku me urdhër të prokurorit janë liruar në procedur të rregullt pasiqë prokurori ka konstatuar se vepra ka mbetur në tentativë.
Kosovanews ka siguruar disa fotografi të veturave të cilat policia i ka dërguar në Njesinë e Trafikut Rajonal në Prizren e ku sipas burimeve njëra i përket djalit të gjyqtarit Skender Çoçaj.
Çoçaj ka qenë kryesues i Këshillit Gjyqësor të Kosovës nga viti 2019 deri më 2021, ndërsa aktualisht është gjyqtarë në Gjykatën e Aplelit.
Kujtojmë që jo më larg se para 3 muajve pikërisht në rajonin e Prizrenit kishte ndodhur një tragjedi e madhe ku në garat me makina përfunduan me vdekjen e 3 të rinjve dhe 3 të tjerë me lëndime të rënda. Aksidenti tragjik, ndodhi në orët e vona të mbrëmjes së të shtunës me 16 dhjetor 2023 në Autostradën ‘Ibrahim Rugova’ në afërsi të Prizrenit.
