Policia e Kosovës, përmes Sektorit për Hetimin e Krimeve Ekonomike, ka arrestuar sot një person të dyshuar për falsifikim të parave në rajonin e Pejës, pas një hetimi të shpejtë dhe të koordinuar.
Operacioni u zhvillua pas një denoncimi nga një qytetar, i cili kishte pranuar 9,000 dollarë amerikanë në emër të kthimit të një borxhi për shitblerje veturash. Pas dyshimeve për autenticitetin e parave, ai raportoi rastin në polici.
Pas verifikimeve dhe veprimeve hetimore, është identifikuar dhe arrestuar një person nga qyteti i Pejës, i dyshuar për kryerjen e veprës penale “Falsifikim i Parasë” sipas Kodit Penal të Republikës së Kosovës.
Shuma e parave të sekuestruara është 9,000 dollarë amerikanë. I dyshuari është intervistuar në prani të avokatit të tij mbrojtës dhe me vendim të Prokurorit të Pejës është dërguar në mbajtje për 48 orë.
Hetimi është në vazhdim dhe po ndërmerren të gjitha veprimet e nevojshme për të zbardhur plotësisht rastin. Policia e Kosovës, në bashkëpunim me Prokurorinë kompetente, do të vazhdojë të ndjekë me prioritet çështje të tilla për të garantuar sigurinë dhe integritetin financiar të qytetarëve.
