Një punonjës i Qendrës Komunale të Regjistrit Civil në Deçan, është arrestuar si i dyshuar për marrje ryfshfeti.
Burime të KosovaNews brenda institucioneve thonë se i arrestuari është Haxhi Istrefaj nga Deçani dhe ai mbante pozitën e zyrtarit administrativ në ARC.
Policia e Kosovës ka dhënë detaje për këtë rast. Në njoftimin e PK thuhet se i dyshuari në fjalë, dy mërgimtarëve u kishte kërkuar para me qëllim që t’i regjistrojë në sistemin e gjendjes civile në Deçan.
“I dyshuari, H.I., (viti i lindjes 1964, mashkull kosovar), nëpunës në Qendrën Komunale të Regjistrit Civil – Deçan, gjatë vitit 2022 dhe fillim të vitit 2023, në tri raste përmes institucioneve bankare ka pranuar të holla (rreth 1,800 euro). I dyshuari, të hollat i ka pranuar nga viktima e rastit J.J., nga Deçani i cili jeton në Zvicër, me qëllim që të njëjtin ta regjistrojë në sistemin e gjendjes civile në Deçan”.
“Po ashtu në fund të muajit gusht 2023, në Facebook është publikuar edhe një pretendim se i dyshuari, në mënyrë të njëjtë ka vepruar edhe me qytetarin H.E., i cili jeton në Gjermani.
Mbi bazën e këtyre dëshmive e pretendimeve, është krijuar dyshimi se H. I., dyshohet të ketë kryer veprën penale: ‘marrja e ryshfetit’. Hetuesit policorë janë duke vazhduar me trajtimin e rastit përfshirë identifikimin dhe intervistimin e viktimës së dytë (H.E., nga Gjermania)”, thuhet në njoftim.
Kujtojmë se kohën e fundit Drejtoria e Krimeve Ekonomike ka qenë mjaft aktive në goditjen e rasteve të korrupsionit në institucione të ndryshme të Kosovës.
