Zyrtarë të shumtë policor nga Njësitë Speciale të Policisë së Kosovës kanë zbarkuar sot në Kaçanik.
Një aksion i gjerë policor po zhvillohet prej disa orësh në këtë komunë.
E në lidhje me këtë aksion nga Policia e Kosovës kanë njoftuar se bastisja është e lidhur me rastin e rëndë të vrasjes së rreshterit policor, Muhamed Lika që ndodhi ditë më parë.
Në një përgjigje për lajmi.net zëdhënësi policor Baki Kelani deklaroi se aksioni i sotëm lidhet me rastin e vrasjes së rreshterit Lika.
“Policia e Kosovës me njësitë e saja relevante pas hetimeve intensive sot në orët e hershme të mëngjesit ka filluar një operacion policor i cili ndërlidhet me rastin e vrasjes së rreshterit policor, Muhamed Lika në Kaçanik”,tha zëdhënësi i policisë së Kosovës, Baki Kelani.
Kelani deklaroi se pas përfundimi të aksionit do të bëhen publike informacionet shtesë.
Vrasja e Muhamed Likës- rreshter policor në Kosovë u bë ditë më parë derisa i njëjti po hynte në banesën të cilën jetonte prej disa vitesh.
Sipas prokurorisë në vendin e ngjarjes ishin parë dy persona të rinj të cilët kishin qëlluar me armë në drejtim të rreshterit Lika.
