Vajza e politikanit serb Nikola Sanduloviq, Klara, që të shtunën bëri homazhe në Prekaz, është ndalur nga Policia e Serbisë në pikëkalimin kufitar të Merdarit. Siç ka shkruar në Twitter kryetari i Partisë Republikane Serbe, vajzës së tij nuk i është lejuar kthimi në Serbi.
“Regjimi diktatorial i Aleksandar Vuçiqit vazhdon ta persekutojë vajzën time, Klarën. Policia po e mban atë dhe zyrtarët e Partisë Republikane në pikëkalimin kufitar të Merdarit dhe nuk po i lejojnë të hyjnë në Serbi”, ka shkruar ai.
The dictatorial regime of Aleksandar Vucic continues to persecute my daughter Klara. The police are holding her together with the officials of the Republican Party at the Merdare border crossing and do not allow them to enter Serbia.@aliciakearns @MichaelPolakLaw @David_Cameron
— Nikola Sandulovic (@Sandulovic_N) January 27, 2024
Gjatë ditës, Klara Sanduloviq bëri homazhe te varrezat e Jasharëve në Prekaz. “Të respektojmë që të mos përsëritet më”, ishte mesazhi i shkruar që ajo la te varri i Blerina Jasharit. Javë më parë, kryetari i Partisë Republikane Serbe u arrestua dhe ka thënë se është rrahur nga shërbimi sekret serb, vetëm për faktin që ka vizituar Prekazin.
Edhe e bija e tij të shtunën pati paralajmëruar po ashtu se mund ta presë një fat i ngjashëm.
“Unë do të doja të shihja se çfarë do të bënte Qeveria serbe në lidhje me këtë sepse për këtë veprim, babai im u rrëmbye nga policia sekrete serbe, u rrah brutalisht, u torturua dhe u fut në burg. Ai u kthye në shtëpi gjysmë i paralizuar, në gjendje të tmerrshme dhe gjysmë i vdekur. Nuk e di se çfarë trajtimi do të kem nga Qeveria serbe për këtë dhe do të doja të shihja nëse Qeveria e Serbisë do të bëhet fashiste, do të na rrahë të gjithëve dhe do të na fusë në burg të gjithë apo ky është trajtim vetëm për babanë tim, gjë që e bën atë viktimë politike në vendin e tij”, ka thënë ajo.“Tani jo, por ne do të shohim kur të kthehemi, sepse ata e kanë traditë të ndalin njerëz nga partia jonë, veçanërisht babanë tim, duke e mbajtur në kufi me orë të tëra”.
Sanduloviqi është shoqëruar nga nënkryetari i Partisë Republikane të Serbisë, Mihajllo Todiq, i cili përsëriti kërkimfaljen e kryetarit të partisë, për krimet që Serbia ka bërë në Kosovë.
Pas arrestimit të politikanit serb Sanduloviq, edhe avokati i tij, Çedomir Stojkoviq, në janar bëri homazhe te varrezat e Jasharëve. Gjatë kthimit në Serbi, edhe ai u ndalua nga autoritetet e këtij shteti.
