Policia e Kosovës ka dalë me deklaratë lidhur me dorëheqjet e policëve serbë në stacionin policor në veri.
Policia thotë se ka kapacitete për menaxhimin e situatës dhe rrethanave të krijuara dhe të gjitha veprimet do t’i ndërmarrë konform autorizimeve ligjore dhe kushtetuese, si dhe vlerësimeve dhe planifikimeve operacionale, me qëllim të ruajtjes së rendit e qetësisë.
Njoftimi i plotë:
Referuar zhvillimeve aktuale ju informojmë se edhe sot ka pasur paraqitje të dorëheqjeve të punonjësve policorë të komunitetit serb në pjesën e veriut të vendit, në zonën e drejtorisë rajonale të Mitrovicës Veri.
Njoftimet e tyre për dorëheqje janë bërë në rajonet dhe stacionet policore, ku disa prej tyre deri më tani i kanë dorëzuar pajisjet e tyre, për të vazhduar me kompletimin e procedurave tjera të parapara.
Policia e Kosovës ka kapacitete për menaxhimin e situatës dhe rrethanave të krijuara, të gjitha veprimet do t’i ndërmarrë konform autorizimeve ligjore dhe kushtetuese, konform vlerësimeve dhe planifikimeve operacionale, me qëllim të ruajtjes së rendit e qetësisë publike si dhe mbikëqyrjes dhe kontrollit kufitar.
