Në fshatin Dumnicë e Epërme të Podujevës, vend në të cilin të dielën rreth orës 18:00 u krye një vrasje kanë mbetur gjurmët e pranisë së Policisë dhe vizitave të pazakonta në një vendbanim jo fort të frekuentuar.
Familja e Sali Salihut ka tri dekada që është shpërngulur nga Dumnica.
Ndërkaq banorët lokal përpos që e konfirmuan që i njohin nuk pranuan të flasin lidhur me rastin.
As për ndonjë problem të mundshëm të kësaj familje ose vetë të vrarit me dikë tjetër, banorët nuk kanë pranuar të flasin.
Megjithatë RTV Dukagjini mëson se vrasje dyshohet të ketë ndodhur për hakmarrje, për një rast që dyshohet se ka ndodhur tri dekada më parë.
Përkundër interesimit për të marrë një qëndrim të familjes, të njëjtit nuk pranuan të flasin para kamerës, për rastin të cilin Policia e ka cilësuar vrasje.
“VRASJE”, Fsh. Dumnicë e Epërme, Podujevë 26.03.2023 – 18:08. Një mashkull kosovar është gjetur i vdekur në afërsi të shtëpisë së tij. Vdekjen e viktimës e ka konfirmuar ekipi mjekësor në vendin e ngjarjes. Në vendin e ngjarjes përveç njësive relevante policore ka dalë edhe prokurori, i cili ka urdhëruar që trupi i pajetë të dërgohet në obduksion. Nuk raportohet për të arrestuar. Rasti në hetime”, thuhet në raportin e policisë.
Edhe Prokuroria Themelore në Prishtinë rastin e kualifikon “vrasje” ndërsa tregon se trupi i pajetë i Sali Salihut është dërguar për obduksion.
“… me urdhër të prokurorit kujdestar, rasti është kualifikuar “Vrasje”, sipas KPRK-së. Prokuroria në koordinim me Policinë janë duke i ndërmarrë të gjitha veprimet e nevojshme hetimore në mënyrë intensive, me qëllim të ndriçimit të rrethanave të këtij akti dhe identifikimit të personave të përfshirë në këtë rast. Mosha e viktimës është 58 vjeç, derisa me urdhër të prokurorit trupi i pajetë është dërguar në IML për t’iu nënshtruar obduksionit”, thuhet nga Prokuroria.
Varrimi i Salihut sipas lajmërimeve në faqet lokale të qytetit bëhet nesër nga ora 15:00, në varrezat e fshatit ku u gjet i vdekur.
