Drejtori i të ashtuquajturës Zyrë për Kosovën në Qeverinë e Serbisë, Petar Petkoviq, ka thënë se serbët në Kosovë, nuk duan targa të tjera përveç atyre që i kanë mbajtur deri më tani, e që janë ilegalisht të lëshuara nga autoritetet serbe në emër të qyteteve të Kosovës.
Në një intervistë për televizionin publik serb, të hënën, Petkoviq e ka vlerësuar vendimin e Qeverisë së Kosovës për sanksione të shkallëzuara si të “paligjshëm” dhe “të dhunshëm”.
“Asgjë e mirë nuk vjen nga Prishtina për popullin serb. Kjo është në kontrast me të gjitha marrëveshjet me të cilat kemi rënë dakord në vitet 2011 dhe 2016”, tha Petkoviq.
Ai ka shtuar se kryeministri i Kosovës, Albin Kurti duhet ta kuptojë se serbët në Kosovë e ndiejnë veten si shtetas të Serbisë.
“Ata kanë targa të lëshuara nga Republika e Serbisë, nuk duan targa të tjera dhe prandaj Kurti, por edhe ata që mbështesin të ashtuquajturën Kosovë të pavarur, duhet ta kuptojnë se serbët në Kosovë ndihen si qytetarë të Republikës së Serbisë. Qëllimi i vërtetë i Albin Kurtit është dëbimi i popullit tonë”, theksoi më tej ai.
Ai shtoi se në takimin e fundit të mbajtur javën e kaluar me presidentin serb, Aleksandar Vuçiq, përfaqësuesit serbë në Kosovë kanë thënë se nuk do ta pranojnë një vendimin për konvertimin e targave në RKS dhe se do të luftojnë, por sipas tij, “me mjete paqësore dhe demokratike”.
“Ideja e Albin Kurtit është që të frikësohet populli serb, fillimisht me disa paralajmërime, e pastaj me gjoba. Nuk do të lejojmë kurrë të ndodhin një stuhi tjetër, do të kërkojmë zgjidhje, do të shkojmë drejt gjetjes së një zgjidhjeje kompromisi, por këtu tani gjërat nuk varen nga ne”, ka thënë ai.
Pronarët e veturave me targa ilegale kanë afat edhe sot për t’i regjistruar ato në RKS për të shmangur qortimet dhe më pas gjobat.
Qeveria ka planifikuar që pas 21 prillit 2022, të mos ketë asnjë veturë me targa ilegale që i lëshon Serbia.
Në veri vlerësohet se janë rreth 9.000 vetura me targa ilegale
