Ankesa për trajtimin nga institucionet të 26-vjeçares, Arbëresha Haziraj, që vuan nga epilepsia e hemiparesa, shkaku i së cilës e ka të palëvizshme njërën pjesë të trupit, ka drejtuar familja e saj.
Babai i saj tregon se në ditën kur i është dashur të shkojnë para komisionit të Ministrisë, për të aplikuar për asistencë prej 375 eurosh, ata u detyruan të presin, edhe pse Arbëresha, sipas tyre, përballej me sulme epileptike.
“Kur kemi ardhur prej 12 e 30 e kemi pasur terminin, kemi ardhur, jemi lajmëruar se e kemi pasur (v.j vajzën) nën ndikim të sulmit epileptik, kemi pritur afro 40 minuta. U thashë të vijnë ta verifikojnë, punëtorja e qendrës sociale nuk u gjet aq shumë, me fjalë nuk u gjet mirë, pastaj e shoqja shkoi i tha se ‘gazetarët i kemi lajmëruar’, tha s’kemi çfarë t’u bëjmë, me sulm epileptik, ama 40 minuta kemi pritur”, ka thënë Muhamet Haziraj.
Ai thotë se është e paarsyeshme që një komisioni i përbërë prej njerëzve të lëvizshëm, t’i detyrojë personat që kanë vështirësi shëndetësore e që nuk mund të ecin, të dalin para tij. Ka edhe një rekomandim në këtë drejtim.
“Për ne si prindër është maltretim i madh, sepse për rastet specifike duhet të formohet një komision ‘ad-hoc’ që i verifikon nëpër shtëpitë ku jetojnë, sepse është e pamundshme ta sjellim një fëmijë në gjendje të gati-gati vdekjes klinike, kur e rrok epilepsia… Në qoftë se nuk mund të arrijmë, dhe nëse s’e kemi vajzën në gjendje për ta vendosur në karrocë, atëherë kalojnë terminët, kështu që po zvarriten”, ka shtuar ai.
Ankesa Haziraj ka edhe për sjelljen e mjekëve në Neurologji, derisa institucionet i akuzon se po synojnë t’i tkurrin listat e përfituesve të skemave të personave me aftësi të kufizuara.
“Thanë se vajza ka vetëm epilepsi, e vajza ka hemiparesë. Dokumentet që i kemi dërguar në QKUK në Neurologji me dokumentacion të plotë e kanë marrë dhe e kanë parë që ka mashtrime dhe ka manipulime që t’i heqin kategori nga skema sociale, kjo a është e dirigjuar nga Qeveria apo i bëjnë kokë në vete ne nuk e dimë”, ka akuzuar ai.
Akuzat lidhur me këto pretendime i ka mohuar drejtori i Neurologjisë në QKUK, Edmond Komoni.
“Çdo rast pas shqyrtimit e merr një raport të shkruar dhe të nënshkruar nga anëtarët e Komisionit. Por duhet ta kemi të qartë se çdokush që hyn në komision nuk i plotëson kriteret e specifikuara të Ligjit. Komisioni nuk ka mundësi t’i zbusë diagnozat, sepse ato janë dokumente zyrtare të shkruara dhe të nënshkruara dhe nuk mund të ndryshohen, sepse më tutje kalojnë nëpër komisione të Ministrisë së Mirëqenies si dhe nëpër gjykata. Me vite funksionon Komisioni për Paraplegjikë ku çdo të enjte kryhen 15-20 raste, që d.m.th janë proceduar me mijëra lëndë deri tani pothuaj pa ankesa evidente”, ka thënë Komoni
Megjithatë, ai e ka pranuar se krijohen tollovi.
“Por ajo çka na bën të pakënaqur është se nganjëherë na krijohet tollovi në korridore ku qëndrojnë personat me aftësi të kufizuara dhe shumë familjarë të tyre mund të presin më gjatë deri sa t’u vijë rendi, ka zhurma e të cilat mundohemi t’i evitojmë me terminë më të saktë. Kurse pjesa profesionale dhe kriteret se kujt i takon pensioni është e specifikuar me ligj dhe çdokush mund t’u drejtohet me ankesë organeve përkatëse”, ka shtuar tutje ai.
Në “Handikos” nuk kanë dashur të komentojnë lidhur me këtë rast specifik, pasi kanë thënë se ankesat e tyre ua kanë bërë të ditura mediave e institucioneve.
Në intervistën për emisionin “60 minuta” këtë javë, drejtori i kësaj organizate, Afrim Maliqi, e ka quajtur keqtrajtim detyrimin e personave me aftësi të kufizuara që të dalin para komisionit për të riaplikuar. Ky veprim, sipas tij, s’është i bazuar në ligj, por në rregullore të komisionit dhe prek jo vetëm familjet si ajo e Arbreshës, por edhe tetraplegjikët, paraplegjikët, të verbrit dhe personat e tjerë me aftësi të kufizuara.
Organizatat për të drejtat e personave me aftësi të kufizuara sivjet i kanë shtuar ankesat e tyre për refuzim të padrejtë të shumës prej 225 eurosh për kujdestar personal dhe material për parandalim të plagëve.
Siç ka raportuar KOHA, sipas ministrisë, 547 persona janë larguar prej kategorisë së parë që e përfitojnë këtë shumë.
Shqetësimin për këtë, “Handikosi” ua ka përmendur Qeverisë, Presidencës e edhe ministrit të Administrimit të Pushtetit Lokal, kur pranuan një donacion izraelit me karroca.
Në MFPT nuk u janë përgjigjur pyetjeve të KOHËS lidhur me shqetësimet që i ka ngritur familja Haziraj.
