Franziska Giffey, senatore nga Berlini dhe ish-kryetare e bashkisë së kryeqytetit gjerman është sulmuar nga një burrë në një bibliotekë lokale në sulmet e fundit ndaj politikanëve gjermanë nga aktorë të së djathtës ekstreme, shkruan BBC të mërkurën.
Giffey, figurë e njohur e Partisë Socialdemokrate (SPD) e kancelarit Olaf Scholz, u trajtua pak në spital pasi u godit në kokë dhe qafë me një qese “të mbushur me diçka të fortë”, ka thënë policia.
Politikanët janë vënë në shënjestër të sulmeve ditët e fundit, veçanërisht në Gjermaninë Lindore.
Kolegët reaguan të tronditur ndaj sulmit ndaj Franziska Giffey, senatores së Berlinit për ekonominë. Giffey shërbeu në qeverinë e fundit federale të Angela Merkelit si ministre për gratë dhe familjet përpara se të bëhej kryebashkiake e Berlinit në vitin 2021.
“Nuk ka asnjë justifikim për këto sulme. Një kufi është kaluar dhe ne si shoqëri duhet t’i rezistojmë me vendosmëri”, ka thënë Giffey.
Policia ka thënë se ka identifikuar autorin e dyshuar, por nuk dha detaje të tjera.
Të premten e kaluar, një kandidat gjerman për Parlamentin Evropian u sulmua rëndë teksa kishte vendosur postera në Dresden.
Matthias Ecke, 41 vjeç, iu desh të operohej në spital pasi u sulmua nga katër persona. Katër adoleshentë janë aktualisht nën hetim dhe të paktën njëri ka qenë i lidhur me të djathtën ekstreme.
Një punonjës i fushatës për të Gjelbrit në Dresden është rrahur dhe shkelmuar gjithashtu.
Një politikane e të Gjelbërve u sulmua nga dy persona teksa vendoste postera të martën në mbrëmje në të njëjtin qytet.
Policia e Dresdenit ka konfirmuar se për rastin e politikanes ka arrestuar një burrë dhe një grua, që kishin bërë përshëndetjen e Hitlerit kur ajo ka filluar t’i vendos posterat.
Ministrat e brendshëm federalë dhe shtetërorë u takuan të martën për të vlerësuar se si t’i përgjigjen sulmeve.
Michael Stuebgen, ministri i Brandenburgut që kryesoi konferencën e ministrave të brendshëm, u tha gazetarëve se ligji penal nuk u jep më politikanëve dhe aktivistëve mbrojtjen e duhur.
Partia e ekstremit të djathtë, Alternativa për Gjermaninë (AfD), po kërkon vendin e dytë në zgjedhjet e Parlamentit Evropian më 9 qershor dhe shpreson të bëhet partia politike dominuese në zgjedhjet shtetërore në Gjermaninë lindore në shtator.
Megjithatë, ajo është goditur nga akuzat për spiunazh.
