Në fundjavën që lamë pas, në Tërnoc të Bujanocit përfundoi me sukses edicioni i 20-të jubilar i Turneut Mbarëkombëtar të Futbollit për Fëmijë U-15, që tradicionalisht bashkon ekipe nga të gjitha trevat shqiptare.
Në këtë edicion morën pjesë skuadra nga Durrësi, Tetova, Ulqini, Peja dhe ekipi pritës KF Tërnoci, në një atmosferë të jashtëzakonshme sportive dhe vëllazërore.
Triumfues të këtij turneu dolën të rinjtë e Pejës, të cilët treguan një nivel të lartë loje dhe organizimi. Në fazën e grupeve, Peja mposhti Tetovën 2-1 dhe Durrësin 3-1, për të kaluar pastaj në play-off ku sërish triumfuan ndaj Tetovës 3-0.
Finalja ndaj Durrësit përfundoi pa gola në kohën e rregullt, ndërsa pejanët fituan 5-4 në penallti, duke u shpallur kampion të këtij edicioni.
Turneu, i cili u zhvillua nën moton “Luajmë futboll, duke njohur trojet tona”, ka nisur para 20 vitesh në Durrës, dhe edicioni i ardhshëm pritet të rikthehet pikërisht atje – në qytetin ku lindi kjo nismë fisnike.
Një ndër figurat më të dalluara të turneut ishte Eri Muriqi, 14-vjeçar nga Peja, i cili luajti titullar në të katër ndeshjet e skuadrës, pa u zëvendësuar asnjëherë, duke shfaqur aftësi të shkëlqyera në mbrojtje.
“Jam shumë i lumtur që isha pjesë e këtij suksesi. Të përfaqësosh Pejën dhe të japësh maksimumin për klubin është një ndjenjë e veçantë. Edhe pse nuk kam shënuar gol, kam dhënë kontribut të madh në mbrojtje dhe në ndërtimin e lojës. Ky trofe na jep motiv dhe vullnet për të vazhduar edhe më fuqishëm”.
“Falënderoj trajnerët e mi në klub – Ilir Nallbani, Eroll Tabaku dhe Besi Domniku – për përgatitjen e vazhdueshme, si dhe trajnerin e përfaqësueses rajonale të Pejës, Liridon Islami, dhe koordinatorin Valdet Shoshi, për përzgjedhjen dhe përkrahjen që më kanë dhënë”, u shpreh Eri Muriqi.
Peja, me këtë brez të artë të të rinjve dhe një staf teknik të përkushtuar, tregon se ka bazën për ndërtimin e së ardhmes.
