Sekretarja e përgjithshme e PDK-së Vlora Çitaku, para seancës konstituive të Kuvendit të Kosovës ka thënë se në seancën e radhës pas konstiutimit te Kuvendit do të kërkojnë që të votohet rezoluta për procesin në Hagë.
“Ka momente kur politika hesht dhe historia flet. Ky ka qenë një nga ato momente.
Dua t’ju njoftoj që në seancën e parë të Kuvendit, së bashku me marrëveshjet ndërkombëtare, ne do të kërkojmë që të miratohet edhe rezoluta e përgatitur nga ekspertët e pavarur për procesin në Hagë”, tha Çitaku.
Deputeti i PDK-së Përparim Gruda, i cili prezantoi këtë rezolutë tha se kërkojnë që procesin në Hagë ndaj ish-krerëve të UÇK-së ta kthejnë në binarë të standardeve evropiane për gjykim të drejtë dhe të paanshëm, dhe standardeve të përcaktuara me Kushtetutën e Kosovës.
“Rezoluta në vend të parë kërkon nga Dhomat e Specializuara dhe Zyra e Prokurorit të Specializuar që procesin në Hagë ndaj ish-krerëve të UÇK-së ta kthejnë në binarë të standardeve evropiane për gjykim të drejtë dhe të paanshëm, dhe standardeve të përcaktuara me Kushtetutën e Kosovës, Konventën Evropiane të Drejtave të Njeriut, Deklaratën Universale të Drejtave të Njeriut dhe praktikën ose jurisprudencën e Gjykatës Evropiane për Liritë dhe Drejtat e Njeriut. E dyta, rezoluta po ashtu kërkon që Ombudspersoni ose Avokati i Popullit që ndodhet pranë Dhomave të Specializuara në Hagë, të luajë rolin e vet, të cilin mendojmë që e ka kaluar në heshtje deri tani, për të adresuar të gjitha shkeljet që kanë ndodhur gjatë procesit të gjykimit të krerëve të UÇK-së. Po ashtu pikë tjetër e kësaj rezolute, të cilën dua ta ndaj me ju, është kërkesa nga vendet financuese të Gjykatës Speciale që të sigurohen që financimi i tyre bëhet ndaj një organi që zbaton standardet evropiane për gjykim të drejtë. Pra të kërkojnë llogari nga Dhomat e Specializuara dhe të kërkojnë përgjegjësi që procesi të mbetet i drejtë dhe i pavarur, ashtu siç është procesi gjyqësor në çdo vend që është financues i Gjykatës Speciale”, tha ai.
Ai përmendi dhe pikën e tretë të rezolutës.
“Pika e pestë, rezoluta inkurajon të gjitha organizatat ndërkombëtare që operojnë në nivel të Bashkimit Evropian dhe përtej, që të marrin pjesë aktivisht në monitorimin e procesit gjyqësor në Hagë. Pika tjetër është konfirmimi i zotimit dhe përkushtimit të institucioneve të Kosovës që me çdo mekanizëm, përfshirë financimin e duhur, të mbrojë luftën e drejtë e çlirimtare të Hashim Thaçit, Kadri Veselit, Jakup Krasniqit dhe Rexhep Selimit”, tha ai
