Anëtarët e Komisionit Qendror të Zgjedhjeve kanë kërkuar raport më të detajuar për mbajtjen e zgjedhjeve lokale të jashtëzakonshme në veri të Kosovës.
Anëtari i Partisë Demokratike të Kosovës në Komisionin Qendror të Zgjedhjeve, Arianit Elshani, tha se ishte paraparë që anëtarët të mblidheshin të martën, por u shty mbledhja për shkak të raportit të mangët.
“Kemi kërkuar më shumë informacione lidhur me vlerësimin e sigurisë, për hapjen e qendrave të votimit, ku zakonshëm është zhvilluar procesi zgjedhor. Ne kemi pranuar një raport, por e kemi konsideruar jo të mjaftueshëm, për të kuptuar saktë gjendjen”, tha Elshani.
Zëdhënësi i KQZ-së, Valmir Elezi, tha para mediave se po vijojnë përgatitjet për mbajtjen e zgjedhjeve më 23 prill, por s’mohoi se ka sfida në këtë proces.
“Komisioni Qendror i Zgjedhjeve po i vazhdon përgatitjet në kuadër të planifikimeve. I kemi parasysh edhe sfidat që e shoqërojnë këtë proces zgjedhor. Jemi të përkushtuar t’i përmbushim detyrat tona kushtetuese dhe ligjore për planifikimet po bëhen në bazë të dinamikës. Për qendrat e votimit, në mbledhjen e radhës do të miratohet lista e vendvotimeve. Jemi duke i kryer detyrat tona kushtetuese dhe ligjore për organizimin e këtyre zgjedhjeve”, tha Elezi per kohen.
Zgjedhjet e jashtëzakonshme do të mbahen për kryetarë të Mitrovicës së Veriut, Zveçanit, Zubin Potokut dhe të Leposaviqit. Zgjedhje për kuvendet komunale do të zhvillohen në Leposaviq dhe Zveçan.
Më 6 prill është certifikuar lista e votuesve.
