Partia Demokratike e Kosovës (PDK), ka shprehur shqetësimin e saj për pozitat menaxheriale në sektorin publik, duke kërkuar që personat që kanë fituar vendet e punës mos të preken, ndërsa ka akuzuar Qeverinë Kurti që përmes ligjit për Zyrtarët Publik po tenton ta kapë Administratën Publike dhe të largojë nga puna mijëra zyrtarë civilë që kanë pozita të larta menaxheriale.
Koordinatori i Departamentit për Drejtësi në Kabinetin për Qeverisje të Mirë, Përparim Gruda, ka thënë se Projektligji për Zyrtarët Publik të Kosovës, paraqet synimin për të politizuar administratën publike të shtetit dhe për t’a kthyer atë në shërbim të Lëvizjes Vetëvendosje.
“Qeveria aktuale pasi ka kapur çdo institucion publik duke emëruar e punësuar familjarët e tyre dhe zyrtarët partiakë në pozita drejtuese dhe në borde të institucioneve publike, tani ka nisur përpjekjet kundër kushtetuese në administratën publike. Kjo qeveri këto ditë ka prezantuar Projektligjin për Zyrtarët Publik të Kosovës, i cili paraqet synimin e qartë të partisë në pushtet për të politizuar administratën publike të shtetit dhe për t’a kthyer atë në shërbim të Lëvizjes Vetëvendosje”, tha ai.
Gruda tha se nëpërmjet projektligjit për Zyrtarët Publik të Kosovës, qeveria po cenon sigurinë juridike të shërbimit civil.
“Qeveria ka paraparë që pas hyrjes në fuqi të këtij projektligji, të ju ndërpres kontratat e punës që kanë fituar sipas akt emërimeve të përhershme, të gjithë zyrtarëve të nivelit të ulët dhe të mesëm drejtues në administratën publike, të shpallë konkurse të reja për të gjitha këto pozita, dhe këto pozita të jenë me mandat 4 vjeçar. Këtu bëhet fjalë për mijëra zyrtarë që aktualisht mbajnë këto pozita. Me këtë rast, mijëra familje do të mbesin pa të ardhurat e tyre. Pra, për pozitat e të gjithë këtyre zyrtarëve do të shpallen konkurse të reja dhe atyre do të ju pushoj marrëdhënia e punës që kanë tani, për tu zëvendësuar me militantë partiak.”, tha Gruda.
Ai tha se në rast të miratimit dhe zbatimit të këtij projektligji, administrata publike do të politizohet, do të hapet mundësia e korrupsionit dhe do të bëhet e cenueshme sa herë ndërrohen qeveritë.
Partia Demokratike e Kosovës i bën thirrje Qeverisë Kurti që para se ta miratojë këtë projektligj, të largojë dispozitat kundër kushtetuese që shkelin detyrimet e Kosovës karshi Bashkimit Evropian të marra përmes MSA-së.
“Po ashtu, i bëjmë thirrje Zyrës së BE- në Kosovës që të kundërshtoj me gjithë forcën e saj këtë nismë të qeverisë për të shkatërruar administratën e shtetit. PDK nuk do të lë mjet dhe rrugë demokratike pa përdorur për t’i mbrojtur shërbyesit civilë nga ky arbitraritet brutal dhe se nuk do të lejoj në asnjë mënyrë që rruga evropiane e Kosovës të pengohet nga mungesa e profesionalizmit, qëllimet jo të mira dhe synimet e qarta të kësaj qeverie për të vënë administratën e shtetit në shërbim të partisë në pushtet”, tha Gruda.
Ai tha se vërejtjet e Zyrës së Bashkimit Evropian për këtë projektligj, qeveria aktuale nuk i ka marrë parasysh.
Javën e kaluar zëvendësministri i Punëve të Brendshme, Bardhyl Dobra, deklaroi se kanë pranuar komente nga rreth 80 institucione lidhur me Projektligjin për paga dhe atë për zyrtarët publikë.
Të gjitha këto komente tha se po bëjnë të pamundurën që sa më shpejtë të përfundojnë me shqyrtimin e tyre dhe pastaj projektligjet t’i dërgojnë për miratim në Qeveri dhe Kuvend.
Qeveria po synon që krahas projektligjit për paga të rregullojë edhe çështjen e pozitave në sektorin publik, duke synuar që me ligjin e ri të hapet mundësia që pozitat menaxheriale të bëhen me mandat dhe kështu të hapet mundësia e konkurrencës./KosovaNews
