Si pasojë e të shtënave me armë zjarri, Faruk Isufi nga Klina ka ndërruar jetë.
Burime të IndeksOnline pohojnë se incidenti ndodhi në fshatin Bokshiq, teksa i dyshuar për vrasjen e tij është vëllai i Farukut, Jetmiri.
Për gjendjen e Farukut është deklaruar Spitali i Përgjithshëm i Pejës, që pohon se viktima u çua në spital pa shenja jete.
“Sot, rreth orës 15:30, në Spitalin e Përgjithshëm në Pejë është sjellë një person i lindur në vitin 1977, i plagosur me armë zjarri.
Pavarësisht përpjekjeve të ekipit mjekësor, personi ka ardhur pa shenja jete” thuhet në njoftimin e spitalit.
Rasti ndërkohë është konfirmuar edhe nga zëdhënësi i policisë për rajonin e Pejës, Fadil Gashi.
“Rreth orës 15:10 policia është njoftuar se, pas një fjalosjeje mes dy vëllezërve, njëri nga ta e qëlloi tjetrin me armë. Viktima u dërgua në emergjencën e Klinës, e më pas u bart drejt Spitalit të Pejës. Pak para se të nisej në drejtim të QKUK-së për tretman mjekësor, viktima fatkeqësisht ndërroi jetë. Në vendin e ngjarjes kanë dalur njësitet relevante të policisë dhe Prokurorisë, të cilat po vijojnë me procedurat hetimore” deklaroi Gashi.
