Ish- policit serb, Dejan Pantiq, që dyshohet për sulm ndaj Policisë së Kosovës dhe Komisioneve Komunale Zgjedhore në veri, i është ndryshuar masa nga paraburgimi në arrest shtëpiak.
Suzana Pantiq, gruaja e Dejan Pantiqit, u gëzua kur mori lajmin se burri i saj po kthehej në shtëpi pas tre javësh paraburgim dhe tregoi se e ka telefonuar Vuçiqi dhe çfarë i ka thënë.
“E mora vesh lajmin, më thirri presidenti Vuçiq para jush, më tha se i ka bërë të gjitha, se është munduar, se përpjekja ka pasur sukses. Më pyeti se si ndihesha”, ka thënë Suzana Pantiq, bashkëshortja e të arrestuarit Dejan Pantiq, arrestimi i të cilit u pasua me barrikada në Kosovë.
E pyetur se si ndihet ajo ka thënë se kjo është dita më e lumtur në jetën e saj.
Gëzimin nuk e ka fshehur as djali i Pantiqit, Predrag.
“Nuk ka njeri më të lumtur se ne tash, faleminderit të gjithëve, faleminderit njerëzve, faleminderit Serbisë, veçanërisht faleminderit presidentit Vuçiq, ne presim që babai ynë të vijë në shtëpi gjatë ditës”, tha Predrag Pantiq.
Gjykata Themelore në Prishtinë pas kërkesës së Prokurorisë ia ka ndryshuar masën e paraburgimit Pantiqit në masë të arrestit shtëpiak.
Pantiq akuzohet për sulm terrorist, nën dyshimet se kishte sulmuar zyrat e KQZ-së në veri të Mitrovicës.
Por ky dyshim nuk ia ka mbushur mendjen prokurorit dhe gjykatësit që të mbajnë në paraburgim dhe morën masë lehtësuese ndaj ish- policit serb.
Kryeministri i Republikës së Kosovës në një konferencë për media pas mbledhjes së Qeverisë së Kosovës ka folur edhe për lirimin e Dejan Pantiq në masën e arrestit shtëpiak.
Kurti ka shfaqur mospajtimin e tij me një vendim të tillë të Gjykatës Themelore të Prishtinës, duke thënë se do të ishte shumë kureshtar ta dinte se kush është prokurori që ka kërkuar ndryshimin e masës së paraburgimit me arrest shtëpiak e cili është gjyqtari që e ka aprovuar meqë Dejan Pantiq akuzohet për terrorizëm.
“Mirëpo kur kemi akuzë për terrorizëm të dërgohesh në arrest shtëpiak.. , unë jam shumë kureshtar ta marr vesh se cili është ai prokuror që kërkon arrest shtëpiak e cili është ai gjyqtar i procedurës paraprake që e aprovon”, ka thënë Kurti para gazetarëve.
Ndërkaq më vonë është deputeti i Kuvendit të Kosovës, Dimal Basha që ka treguar se gjyqtari që mori vendimin për masën lehtësuese për personin që akuzohet për terrorizëm, është Mentor Bajraktari.
Basha shfaq mospajtimin e tij dhe pyet se si një gjyqtar normal arrin të vlerësoj se terroristi qenka më sigurt në shtëpi se sa në paraburgim.
“Po me pas qenë n’Serbi i kish shqiptu masë ma t’randë se ky n’Kosovë. Nuk ka vetting që ta hjek tutën, po as që ta shton dozën e patriotizmit!”, shkroi ai në postimin e tij në Facebook.
