“1588 municione fishek, 10 armë të gjata, 62 copë shokbomba 1,5 kg eksploziv, 4 radiolidhje, 1 shurdhues, 33 karikatorë, 7 maska, 1 gaz maskë, 1antiplumb, 1 uniformë e ushtrisë serbe, 10 uniforma të policisë së Kosovë”.
Ky është armatimi i konfiskuar nga Polica e Kosovës gjatë një aksioni në veri të vendit, ka bërë të ditur drejtori i Përgjegjshëm i PK-së, Gazmend Hoxha, i cili ka theksuar se është arrestuar një ish-polic.
Hoxha në një konferencë për media nga veriu i vendit ka thënë se Policia e ka siguruar informacionin për këtë rast nga qytetarët dhe Agjencia e Kosovës për Inteligjencë (AKI).
“Pas informacioneve të pranuara nga qytetarët dhe nga AKI-ja, Policia ka kryer një operacion në rrethinën e Zveçanit, respektivisht në afërsi të urës të hekurt, ka pjesa e Rudarës… Policia do vazhdojë hetimet për të zbuluar grupin terrorist, një person është duke u intervistuar, i njëjti ka qenë pjesë e policisë së Kosovës”, ka thënë Hoxha.
Ndërsa, ministri i Punëve të Brendshme, Xhelal Sveçla, ka bërë të ditur se ky lloj armatimi i konfiskuar është i ngjashëm me armatimin e përdorur në sulmin terrorist të 24 shtatorit, në Banjskë të Zveçanit.
“Lloji i armatimit eshtë i ngjashëm me atë të Banjskës, një pjesë e këtij armatimi janë përdorur më herët për të shkaktuar ndjenjë pasigurie tek qytetarët. Situata e tanishme në këtë pjesë është e qetë falë sukseseve të policisë, kemi më pak armë në duart e tyre e më shumë informata të grupit të Radojcicqit që i vazhdojnë trajnimet në Serbi e siç duket edhe në disa në pjesë të Kosovës”, ka thënë Sveçla.
