Pas njoftimeve të Policisë së Kosovës për shpërndarjen e disa email-eve të rreme, edhe Policia e Shtetit në Shqipëri ka paralajmëruar qytetarët për raste të ngjashme mashtrimi.
Policia e Kosovës, përmes një deklarate zyrtare, ka mohuar çdo lidhje me email-et e shpërndara, të cilat pretendohet se janë dërguar nga ky institucion. Sipas njoftimit, bëhet fjalë për dokumente të falsifikuara, të emërtuara si “Ftesë/Arrestim i menjëhershëm”, të cilat i kërkojnë marrësve të paraqiten brenda 24 orëve në stacionin policor.
“Nuk janë dokumente zyrtare të Policisë së Kosovës, e aq më pak të lëshuara nga zyrtarë të lartë brenda PK-së. Bëhet fjalë për email-e dhe dokumente të falsifikuara, të përdorura për qëllime të caktuara”, thuhet në njoftimin e Policisë së Kosovës.
Edhe Policia e Shtetit në Shqipëri ka bërë të ditur se qytetarëve u janë dërguar mesazhe elektronike të rreme me përmbajtje kërcënuese, në të cilat pretendohet se ata janë nën hetim për krime kibernetike apo vepra penale në fushën e narkotikëve. Në këto email-e u kërkohet që të paraqiten brenda 24 orëve në polici.
“Email-et janë false dhe nuk kanë asnjë lidhje me Policinë e Shtetit apo me ndonjë strukturë zyrtare të saj”, thuhet në njoftim.
Sipas autoriteteve, persona të paidentifikuar kanë krijuar adresa elektronike të rreme, duke përdorur emrin dhe kredencialet e Drejtorit të Përgjithshëm të Policisë së Shtetit, për t’u prezantuar si struktura për Hetimin e Krimeve Kibernetike.
“Qytetarët duhet të kenë parasysh se Policia nuk dërgon kurrë njoftime zyrtare për hetime përmes emailit. Asnjë strukturë policore nuk kërkon paraqitje në polici pa një thirrje të firmosur dhe të protokolluar”, thekson më tej Policia e Shtetit.
Sipas njoftimit, qëllimi i këtyre mesazheve është mashtrimi dhe përhapja e frikës tek qytetarët. Policia u bën thirrje qytetarëve që të mos iu përgjigjen dhe të mos shpërndajnë mesazhe të tilla.
Ndërkohë, rasti është në hetim nga Drejtoria e Hetimit të Krimeve Kibernetike, me qëllim identifikimin dhe ndëshkimin e autorëve të kësaj veprimtarie kriminale.
Kujtojmë se një ditë më parë edhe Policia e Kosovës njoftoi për qarkullimin e disa email-ave të rreme, që pretendojnë të jenë dërguar nga zyrtarë të lartë të saj dhe nga organizata ndërkombëtare si FBI apo INTERPOL. Në këto mesazhe, qytetarëve u kërkohet të paraqiten brenda 24 orësh në selinë e policisë, duke i kërcënuar me veprime të menjëhershme. Policia ka sqaruar se këto dokumente janë të falsifikuara dhe nuk kanë asnjë bazë ligjore.
Lexo po ashtu:
