Parlamenti Evropian është në fazat përfundimtare të negociatave mbi marrëveshjen tregtare BE-SHBA, e cila mund të miratohet deri në fund të marsit, siç kërkoi Komisioni.
Negociatorët e grupeve politike të Parlamentit takuan të martën Komisionerin për Tregtinë, Marosh Shefçoviq, për të diskutuar zhvillimet e fundit, shkruan Euro News.
Burime bëjnë me dije se ata pritet të arrijnë një marrëveshje në takimin e ardhshëm më 17 mars. Nëse kjo ndodh, marrëveshja do të votohet më 19 mars në Komitetin për Tregti Ndërkombëtare dhe më pas do të marrë miratimin përfundimtar në Plenumin e Parlamentit më 26 mars.
Komisioneri Shefçoviq i bëri thirrje ligjvënësve të ecin përpara edhe pas njoftimit të Presidentit amerikan Donald Trump për tarifat e reja që vënë në dyshim të gjithë kushtet e marrëveshjes. Tarifat 10% mbi importet nga aleatët e SHBA-së, përfshirë BE-në, të shpallura nga Trump në shkurt, ndaluan procesin e miratimit, i cili ishte ndalur më parë për shkak të pretendimeve të Trump mbi Greenlandin.
Këto tarifa të reja u shtuan mbi ato që ishin vendosur para se Trump të kthehej në pushtet në 2025, që mesatarisht arrinin 4.8%. Si rezultat, rreth 7% e mallrave evropiane përballen me tarifa mbi 15%, me disa produkte – si djathi – që goditen me tarifa deri në 30%.
Megjithatë, Parlamenti vendosi të rifillojë punën, i inkurajuar nga Komisioneri, duke kërkuar vazhdimisht qartësi nga administrata amerikane mbi këtë çështje.
Pas disa takimeve, negociatorët e grupeve politike duken gati të bien dakord mbi një tekst për t’u votuar. Marrëveshja përfshin një “klauzolë sunset”, që parashikon se lehtësirat tarifore të BE-së skadojnë në fund të marsit 2028, nëse nuk rinovohen shprehimisht, dhe një “klauzolë suspendimi”, e cila aktivizohet në rast se SHBA shkel rregullat e marrëveshjes.
Detajet e fundit mbeten për t’u finalizuar, përfshirë një “klauzolë sunrise” të propozuar nga negociatori i Partisë Popullore Evropiane, Jorgen Warborn. “Kjo klauzolë siguron që marrëveshja të mos hyjë në fuqi para se të konfirmohet që të gjitha elementet e saj respektohen,” tha ai për Euronews, duke shtuar se paqëndrueshmëria e shkaktuar nga lufta në Lindjen e Mesme e bën këtë dhe marrëveshje të tjera tregtare edhe më urgjente.
