Kandidati i AAK-së për deputet, Dardan Krasniqi, ka bërë një deklaratë skandaloze duke e cilësuar mërgatën si një nga arsyet e stagnimit të Kosovës, ndërsa njëkohësisht ka akuzuar qeverisjen e Lëvizjes Vetëvendosje për “thyerjen e kurrizit” të saj.
Në intervistën për Blic Interview me Astrit Gashin, Krasniqi u shpreh se ndikimi i VV-së ndaj bashkatdhetarëve jashtë vendit ka qenë i dëmshëm, duke e çuar situatën deri në atë pikë sa — sipas tij — shqiptarët jo vetëm nuk kthehen më në Kosovë, por “varrosen në mërgim”.
“Kogja një faj të madh pse Kosova ka stagnuar është pikërisht për shkak të mërgatës… por Albin Kurti ua ka thyer kurrizin. Me këtë mentalitet të VV-së, lëre më që shqiptarët nuk po kthehen sa janë gjallë në Kosovë, por tash edhe po varrosen në mërgim”, deklaroi ai.
Krasniqi, ndonëse e quajti mërgatën “pjesën më të lavdishme dhe më të dhimbshme të vendit”, insistoi se qeveria aktuale ka dështuar në përkrahjen e saj dhe ka penguar kontributin e saj të mundshëm në zhvillimin e Kosovës.
Ai shkoi edhe më tej, duke nënçmuar mbështetjen që mërgata i jep Vetëvendosjes.
“Mbështetja e mërgatës ndaj VV-së është një farë fryme, nuk është substancë… por me këtë ekip që ka VV-ja, Kosova e ka të garantuar dështimin”, tha Krasniqi.
Deklaratat e tij kanë ngritur reagime të ashpra në rrjetet sociale, ku janë cilësuar si fyerje ndaj komunitetit që ka mbajtur ekonominë e Kosovës për tri dekada — me remitenca, investime dhe mbështetje të vazhdueshme financiare dhe humanitare.
Krasniqi ndërkohë ka vazhduar retorikën e tij kundër VV-së, ndërsa deklaratat ndaj mërgatës pritet të hapin debat të ri publik.
.
