Gjatë këtij muaji Policia e Kosovës, në bashkëpunim me Prokurorinë Themelore të Ferizajt, zhvilloi një aksion të madh të sekuestrimit afër 100 vilave luksoze në Brezovicë.
Ndër politikanët që u janë sekuestruar vilat figurojnë është edhe deputeti i PDK-së Enver Hoxhaj, e ngjitur me vilën e deputetit Hoxhaj është edhe resorti i familjes së ish-Presidentit Hashim Thaçi ku vilat e Nazmi dhe Blerim Thaçit vëllezërit e ish-presidentit, gjithashtu janë sekuestruar me urdhër të prokurorisë.
KosovaNews gjatë ditës së shtunë ka qëndruar në Brezovicë, ku ka filmuar resortin luksoz të familjes Thaçi të ndërtuar jashtëligjshëm në këtë vend turistik.
Në fotografinë e mëposhtme, shihen vilat luksoze të familjes së ish-Presidentit Hashim Thaçi, të ndërtuara në këtë zonë turistike, ku ndërtimi është i ndaluar.
Këto villa të sekuestruara, në Gjykatën Themelore në Ferizaj, rezulton se janë ndërtuar në Zonën e II-të në Parkun Kombëtar “Sharri” – Zona e Brezovicës, në të cilën ndalohet ndërtimi me Ligjin për Parkun Kombëtar “Sharri”.
Në fotografinë e mëposhtme, shihet vila luksoze e deputetit të PDK-së Enver Hoxhaj që iu sekuestrua gjatë ditës së djeshme:
Deputeti Enver Hoxhaj, vilen luksoze të ndërtuar në zonën e ndaluar , e ka të deklaruar edhe në Agjencinë Kundër Korrupsionit ku pronën prej më se 20 ari e ka deklaruar në vlerë prej 95 mijë euro ndërsa ndërtimin e shtëpisë malore 111 mijë euro. Gjithsej vlera e pronës dhe ndërtimit është 206.956 euro.
Sipas dokumenteve zyrtare të Prokurorisë Themelore në Ferizaj të dorëzuara në Gjykatë, thuhet se sipas ligjit, Zona e II-të e këtij Parku karakterizohet me ekosisteme, vlera peisazhore dhe vlera tjera të natyrës, ku mund të ushtrohet eko-turizmi, bujqësia tradicionale dhe veprimtari, të cilat nuk janë në kundërshtim me qëllimet e Parkut, kurse është e ndaluar ndërtimi i çfarëdo objekti për banim.
Pamjet e dronit tregojnë shkatërrimin masiv që i është bërë zonës turistike të Brezovicës për vite të tëra.
Në këtë listë janë tre gjykatës të Ferizajt, të cilët janë gjykatës nga të tria niveleve të gjyqësorit. Të tretë fillimisht kanë blerë parcela në vitin 2016, ndërsa në vitet e fundit kanë ndërtuar villa. Fjala është për Mustafë Tahirin, Kryetar i Gjykatës Themelore në Ferizaj, Bashkim Hysenin ish-Kryetar i Gjykatës Themelore në Ferizaj, aktualisht gjykatës në Gjykatën e Apelit, si dhe Agim Maliqi, ish-gjykatës i Gjykatës Themelore në Ferizaj, aktualisht gjykatës në Gjykatën Supreme. Të tre këta gjykatës, pronat i kanë blerë bashkë në vitin 2016, në sipërfaqe 2.84 ari, respektivisht 2.4 ari me një çmim prej 6 mijë euro secili./KosovaNews/
