Presidentja e vendit, Vjosa Osmani e ka përkujtuar ish- presidentin Ibrahim Rugova, në përvjetorin e 78-të të ditëlindjes së tij.
Rugova u lind më 2 dhjetor të vitit 1944, në fshatin Cerrcë të komunës së Istogut.
“Sot shënojmë 2 dhjetorin, ditën e lindjes së Presidentit të parë, historik, të Kosovës, dr. Ibrahim Rugovës, njeriut i cili e udhëhoqi popullin e vet drejt lirisë dhe pavarësisë. Presidenti Rugova ishte ideator i shtetit të pavarur të Kosovës e prijës i parë i saj. Me urti e dije të pashoqe, ai arriti ta artikulonte politikisht vullnetin e qytetarëve të Kosovës për të jetuar të lirë, në tokën e tyre e në shtetin e tyre”, ka shkruar Osmani.
Ajo shtoi se udhëheqja e tij është shembull e model të cilin duhet ta kujtojmë çdo ditë e me të cilin duhet të mishërohemi, në mënyrë që vizionin e Presidentit Rugova për shtet ta bëjmë edhe më kuptimplotë, duke e jetësuar çdo ditë atë.
Ibrahim Rugova shkollën fillore e kreu në Istog, ndërkaq tq mesmen në Pejë, ndërkaq studimet i vazhdoi në Prishtinë për Gjuhë dhe Letërsi Shqipe.
Gjatë vitit akademik 1976-77 qëndroi në Paris, ku ndoqi interesimet e veta shkencore në studimin e letërsisë, me përqendrim në teorinë letrare.
Doktoroi në fushën e letërsisë në Universitetin e Prishtinës, në vitin 1984.
