Presidentja e Kosovës, Vjosa Osmani, ka pritur sot në një takim të ngrohtë fundviti Presidentin e Shqipërisë, Bajram Begaj. Osmani tha se takimi ishte një mundësi për të riafirmuar bashkëpunimin e pandalshëm mes dy shteteve dhe rëndësinë e mbështetjes së ndërsjellë.
“Pata kënaqësinë ta pres Presidentin e Shqipërisë, Bajram Begaj, me të cilin biseduam për bashkëpunimin tonë të pandalshëm dhe nevojën që Kosova dhe Shqipëria të jenë gjithmonë pranë njëra-tjetrës”, shkroi Osmani.
Ajo theksoi se në prag të festave të fundvitit i ka përcjellë homologut të saj urimet më të përzemërta, me dëshirën që viti i ardhshëm të sjellë edhe më shumë afërsi, më shumë bashkëpunim dhe hapa të suksesshëm drejt integrimit evropian për të dy vendet.
Osmani dhe Begaj zakonisht takohen në kuadër të agjendës së rregullt të bashkëpunimit institucional mes Kosovës dhe Shqipërisë, ndërsa mesazhet e tyre të fundvitit tradicionalisht fokusohen në thellimin e partneritetit strategjik dhe koordinimin në proceset eurointegruese.
Postimi i plotë:
Në një takim të ngrohtë fundvitit, sot pata kënaqësinë ta pres Presidentin e Shqipërisë, Bajram Begaj, me të cilin biseduam për bashkëpunimin tonë të pandalshëm dhe nevojën që Kosova dhe Shqipëria të jenë gjithmonë pranë njëra-tjetrës. 🇽🇰🫶🇦🇱
Në prag të festave të fundvitit, i përcolla urimet më të përzemërta, me dëshirën që viti që vjen të sjellë edhe më shumë afërsi, më shumë bashkëpunim dhe hapa të suksesshëm drejt Bashkimit Evropian për dy shtetet tona.
