Presidentja e Kosovës, Vjosa Osmani, ka përsëritur se Kosova ka ecur përpara me reformat, sidomos në sundimin e ligjit, por jo edhe Bashkimi Evropian sa i përket anëtarësimit të Kosovës.
Para nisjes së Samitit të liderëve BE-Ballkani Perëndimor në Bruksel, Osmani para mediave ka thënë se procesi i anëtarësimit nuk është i pamundur, megjithëse kompleks.
“Jemi sërish këtu si partner të përkushtuar të BE-së, si shtet që jemi me linjëzim 100% me politikën e jashtme dhe të sigurisë të BE-së, si shtet që vazhdimisht ka treguar progres dhe përkushtim të lartë për reforma, qofshin në sundimin e ligjit, ekonomi apo tjera. Fatkeqësisht nuk i kemi parë që këto reforma janë përkthyer edhe në progres shumë të prekshëm sa i përket integrimit evropian të Kosovës meqë procesi është shumë kompleks… Por nëse e sheh çfarë ka bërë BE-ja në kthim, nuk shohim shumë sepse aplikimi ynë është duke qëndruar ende në sirtarët e BE-së. E di që është proces kompleks por nuk është i pamundur”, u shpreh ajo.
Osmani ka shtuar se nga takimet që ka zhvilluar të mërkurën në Bruksel ka parë “elemente pozitive” për heqjen e plotë të masave ndaj Kosovës.
“Do të punojmë me partnerët tanë që shumë shpejt që të merret vendimi për heqjen e plotë. Kemi elemente pozitive në diskutimet që kisha sot gjatë ditës dhe shpresoj që të kemi heqjen e plotë të masave”, ka theksuar Osmani.
Ajo u pyet edhe për mosprezencën e palës serbe në këtë samit, e u përgjigj se këtë gjë as nuk e ka “vërejtur”.
“Nuk e pasna vërejtur mungesën e tyre, e vetmja gjë që ka sjellë Serbia në këtë samit ka qenë prezenca e një shteti që mbron interesat e Rusisë. Nuk është që do të na mungojë në këtë samit sonte”, ka theksuar Osmani
