Presidentja e Kosovës, Vjosa Osmani, ka thënë se nuk mund të kushtëzohet hapja e shkollave me realizimin e kërkesave “sepse kjo mund të shpie në një terren tepër të rrezikshëm”.
“Shkollat duhet të hapen. Fëmijëve tanë nuk duhet t’u mohohet arsimimi. Për këtë angazhohem unë”, tha presidentja Osmani-Sadriu, duke shtuar se do të donte që sot fëmijët e Mamushës t’i shihte në shkolla.
“Por, për fat të keq, mësimdhënësit edhe sot e kanë vazhduar grevën. U bëj thirrje të gjithë mësimdhënësve ta ndërpresin grevën dhe t’i hapin dyert e shkollave. Gjithçka tjetër zgjidhet, por dëmi që u bëhet fëmijëve duke mos shkuar në banka shkollore është i pariparueshëm”, ka thënë Osmani.
Ajo ka ritheksuar se Ligji i Pagave do të vijë së shpejti, andaj edhe nuk duhet humbur kohën e vlefshme të fëmijëve për shkollim.
“Koha që po ua humbim fëmijëve tanë nuk do të mund t’ua kthejmë. Prandaj, nga këtu në Mamushë, u bëj thirrje të gjithë mësimdhënësve t’i bashkojmë forcat që të kthehemi në shkolla dhe t’ua ofrojmë nxënësve, fëmijëve tanë, dijen në banka shkollore”, deklaroi ajo.
E pyetur nga gazetarët për rolin ndërmjetësues mes sindikatave dhe qeverisë, presidentja Osmani-Sadriu tha se ajo nuk është ndërmjetësuese, por është presidente e të gjithë qytetarëve të Republikës së Kosovës dhe përpiqet të arrijë mirëkuptim mes sindikalistëve dhe qeverisë për të filluar sa më parë mësimi në shkollat e Kosovës.