Presidentja e Kosovës, Vjosa Osmani ka thënë se kërkesat dhe masat e presidentit serb, Aleksandar Vuçiq nuk kanë asnjë rëndësi për Kosovën dhe se qëllimi i tij është destabilizimi i rajonit.
E para e vendit, tha se Vuçiq po tenton t’i hedh hi syve aleatëve ndërkombëtarë me kërkesa për ri integrimin e komunitetit serb në Kosovë, mirëpo tha se qëllimi kryesor ti tij është destabilizimi i vendit.
“Kërkesat e një presidenti të një shteti tjetër të cilat nuk bëhen në mirëbesim dhe nuk e kanë asnjëherë në prioritet interesin e qytetarëve por vetëm interesat destabilizuese të Serbisë, nuk kanë asnjë rëndësi për Kosovën. Jam e bindur që presidenti serb nuk është i interesuar që të realizohen ato që ai i paraqiti si kërkesa, sepse ai nuk është i interesuar në rikthimin e serbëve në institucionet e Republikës së Kosovës. Jam e bindur që kur Vuçiqi flet për rikthimin e serbëve në polici në gjyqësi, ai në fakt po i prezanton këto vetëm si fjalë edhe vetëm si retorikë për ta tërhequr vëmendjen e botës demokratike nga ajo që po ngjan në të vërtetë që janë përpjekjet e tij, të qeverisë së tij, ushtrisë së tij në trajnimin e vazhdueshëm të forcave paramilitare, të cilat kanë për qëllim vetëm dhunën. Nuk e besoj që Vuçiqi është i interesuar që serbët të kthehen në institucione”, u shpreh Osmani.
Osmani tha se asnjë fjalë e Vuçiqit nuk merret seriozisht.“
“Çdo e drejtë që i njihet serbëve dhe të gjitha pakicat të tjera në vendin tonë duhet të zbatohet si e tillë jo se thotë Vuçiqi, por është e drejtë kushtetuese. Ai dëshiron që para Perëndimit të duket kinse po kontribuon për diçka pozitive por në fakt ai punon vetëm për destabilizim dhe kthimin e vendit tonë në vitet e 90-ta. Nuk duhet asnjë fjalë e tij të merret seriozisht, por ne duhet të punojmë maksimalisht për vendin tonë. Njëkohësisht që të punojmë me ndërkombëtarët për hapat para dhe jo mbrapa. Qëllimi i tij ka qenë sa për t’u vënë hi syve përfaqësuesve të BE-së dhe partnerëve të tjerë, por në fakt Vuçiqi kur e thotë këtë nuk e mendon dhe as nuk e dëshiron”, deklaroi Osmani.
Këto komente Osmani i bëri pas lansimit të Qendrës Rajonale të Ekselencës për Gratë, Paqen dhe Sigurinë.
