Presidentja e vendit, Vjosa Osmani, ka thënë se ka zhvilluar një bisedë të gjatë me kryeministrin Albin Kurti, në lidhje me takimin me të dërguarin e BE-së, për dialogun Miroslav Lajçak dhe atë të SHBA-së, Gabriel Escobar.
Osmani për Klan Kosova, theksoi se në lidhje me atë se çka është diskutuar gjatë takimit, ka biseduar gjerë e gjatë me Kurtin.
“Unë jam takuar gjatë sot me kryeministrin dhe kemi diskutuar për këto punë”, tha Osmani, pa dhënë më shumë detaje.
Presidentja Osmani, po viziton të premten komunat e prekura nga vërshimet si pasojë e reshjeve të shiut.
Pas Klinës, ajo ka vizituar edhe Skenderajn, nga ku ka thënë se prioritet është shpëtimi i jetës së qytetarëve.
“Me kryetarin e komunës i vizituam zonat e prekura nga këto vërshime, do të jemi edhe në Mitrovicë. Që nga mbrëmë jemi vazhdimisht në kontakt me institucionet relevante. Prioritet mbi prioritetet ka qenë shpëtimi i jetëve dhe tani do të punojmë me komunat që të sanohet dëmi që është shkaktuar”, është shprehur Osmani.
Osmani tutje ka thënë se siç dëgjoi në Klinë dhe Skenderaj, këto janë vërshime që nuk janë parë më herët.
“Natyrisht dëmi është i madh, por do t’i bashkojmë forcat dhe do t’ia dalim mbanë”, ka deklaruar presidentja.
“Jemi në komunikim me FSK-në, përfshirë gjatë ditës, dhe siç e dini, FSK ka njësitet më të specializuara për kërkim-shpëtim. Prioritet është shpëtimi i jetëve qytetare, kudo dhe kurdo që ka nevojë, ushtria të jetë at”, ka shtuar ajo.
Lexo po ashtu:
