Presidentja e Kosovës, Vjosa Osmani, ka deklaruar se formimi i Qeverisë duhet të ndodhë sa më shpejt, pasi çdo vonesë do të ndikojë negativisht në shtyrjen përpara të reformave.
Osmani theksoi se kjo çështje është në duart e partive politike, duke shpresuar që ato do të arrijnë një marrëveshje dhe të gjejnë një gjuhë të përbashkët.
“Tani e dini që, përkundër angazhimit tim të vazhdueshëm për konstituimin e Kuvendit, ajo çështje ka varetur nga vullneti politik i partive dhe deputetëve. Më në fund, edhe ai proces është përmbyllur, kemi konstituimin e Kuvendit. Pas kësaj, kam mandatuar kryeministrin në detyrë, i cili është nominuar nga partia e parë. Nga data e nominimit, janë 15 ditë për të formuar Qeverinë, mirëpo negociatat për koalicion bëhen vetëm mes partive politike. Si Presidente, nuk mund të ndërhyj dhe nuk mund të di se deri ku kanë arritur ato negociata. Për më shumë informacione, duhet të drejtoheni te partitë”, ka theksar ajo.
Osmani ka theksuar se shpreson se ‘shumë që të kemi sa më parë një Qeveri’.
“Sa më shpejt që të kemi një Qeveri me mandat kushtetues, aq më parë mund të shtyjmë përpara reformat, të miratojmë një buxhet gjithëpërfshirës dhe të marrim vendime të tjera të rëndësishme, të cilat janë paraparë të merren nga Qeveria. Por kur do të ndodhë kjo, varet nga partitë politike. Shpresoj që ato të arrijnë një gjuhë të përbashkët dhe qytetarët e Kosovës të kenë një Qeveri me mandat të plotë”, ka theksuar Osmani, e cila bashkë me drejtoreshën e organizatës “Jeta/Vita”, Nafije Latifi vizituan Onkologjinë.
