Prokuroria Themelore në Ferizaj, njofton se në koordinim me Policinë e Kosovës, të mërkurën ka zhvilluar operacionin e koduar “Mali”, ku, pas një hetimi disa mujor, me urdhër të lëshuar nga Gjykata Themelore në Ferizaj, është bërë kontrolli i shtëpive, banesave dhe objekteve përcjellëse, në fshtarat Ivajë të Kaçanikut, nën dyshimin se në të njëjtën shtëpi është duke u bërë kultivimi i bimëve narkotike të llojit”Canabis Sativa”, me ç’rast janë arrestuar tre persona të dyshuar.
Sipas njoftimit të Prokurorisë, gjatë kontrollit të shtëpive, janë gjetur 26 paketime najloni të mbushura me substancë të dyshuar narkotike të llojit marihuanë, me peshë të përgjithshme prej 5 kg e 227.6 gram si dhe gjatë këtij operacioni, raporton “Betimi për Drejtësi”.
“Të dyshuarit, me vendim të Prokurorit të Shtetit, janë ndaluar në kohëzgjatje prej 48 orësh, për shkak të dyshimit se të njëjtit kanë kryer veprat penale “Kultivimi i bimës së hashashit, shkurres së kokainës ose bimëve të kanabisit” nga neni 272 paragrafi 1 të Kodit Penal të Republikës së Kosovës dhe “Mbajtja në pronësi, kontroll ose posedim të paautorizuar të armëve” nga neni 366 të KPRK-së”, thuhet në njoftimin e Prokurorisë.
Po ashtu, gjatë këtij operacioni, janë sekeustruar: para të gatshme- 160 euro, telefona mobil, një armë pistolet e llojit Sigsauer, një veturë e titpit Golf 4, ngjyrë e zezë, reflektorë, foli alumini, styropor, ventilator të ndryshëm, rezervuar uji, pompë uji, gërshërë, thika, qese najloni për paketim, kamera të sigurisë, DVR, Laptop dhe kartela bankare, vegla pune të ndryshme, termometra digjital, peshore digjitale.
Bëhet e ditur se Prokuroria Themelore në Ferizaj, ndaj të njëjtëve, brenda afatit ligjor, do të paraqesë kërkesë për caktimin e masës së paraburgimit në Gjykatën Themelore në Ferizaj.
