Në një aksion të emërtuar “Freeshopi”, Policia e Kosovës arriti të arrestoj tre persona, ku një nga ta doli të jetë koleg i tyre, pjesëtar i Policisë.
Gjatë kontrollit të trupit dhe lokacionit të tyre, policët në detyrë arritën të gjejnë sasi të substancave narkotike me peshë rreth 370 gram, një peshore, tri thika dhe para të gatshme gati 5 mijë euro.
Dukagjini mësoi se zyrtari policor A.R u kap duke blerë substancën narkotike kokainë.
Pas kësaj, i njëjti është suspenduar nga Inspektorati Policor i Kosovës.
Dhe ky nuk është operacioni i vetëm i Policisë në sektorin e anti-drogës.
Sipas të dhënave të Policisë së Kosovës, që nga janari deri në shtator të këtij viti, Drejtoria për Hetimin e Trafikimit me Narkotikë ka pasur 25 operacione policore.
Aty përfshihet konfiskimi i sasive të shumta të substancave narkotike të ndryshme.
Të dhënat e Policisë së Kosovës:
“Sasitë e konfiskuara Korrik – Shtator 2024
Marihunë: 1054 kg 799.58 gr
Heroinë: 6 kg 154.9 gr
Kokainë : 578. 76 gr
Bimë Kanabisi : 6152
Ekstazi : 66.55 gr”
Sipas kolonelit në pension të Policisë, Refki Morina sipas këtyrë të dhënave del se kjo drejtori ka kryer në mënyrë efikase punën.
“Në bazë të statistikave duket se është bërë një punë e mirë, këto operacione duhet të vazhdojnë edhe në rajonet tjera, pra të koordinohet puna në mënyrë që të minimizohen këto vepra penale”, deklaroi Morina.
Por, Morina ka kritika në mungesën e bashkëpunimit të të gjitha institucioneve në mënyrë që rastet e përdorimit të narkotikëve të parandalohen.
“Edhe institucionet tjera si ajo e arsimit, shëndetësisë të cilat në një mënyrë janë pjesë e strategjisë anti-drogë e ku rolin dominues e ka Ministria e Punëve të Brendshme, e përpos operacioneve të vazhdueshme të Policisë, duhet të ketë edhe forma tjera të parandalimit të kësaj vepre penale”, shtoi Morina.
Javën e kaluar pikërisht kjo Drejtori në një operacion të koduar “007” ka sekuestruar 10 kilogram substancë narkotike të llojit kokainë në një veturë të ndalur në rrugën magjistrale Fushë Kosovë-Prishtinë.
