Seanca e gjykimit të vëllezërve Jeton dhe Nexhat Vllasaliu, të akuzuar për vrasjen e biznesmenit Bedri Rexhepi, është përshkuar me tensione.
Pas propozimit të palës së dëmtuar që të shtyhet seanca pasi që ata nuk ndiheshin mirë emocionalisht duke marrë për bazë që sot ishin bërë 23 muaj që nga zhdukja dhe vrasja e Bedri Rexhepit, dhe pas deklarimit të Nexhat Vllasaliut që ishte për vazhdimit të gjykimit, reagim kishte nga ana e palës së dëmtuar.
“Pajtohna, masi po ndërprehet, me dëshirën tem seanca u kanë me vazhdu, me u kry kjo punë se unë jam i pafajshëm”- tha Nexhat Vllasaliu.
E se kishte sharje nga pala e dëmtuar, këtë gjë e adresoi te gjyqtarja e rastit vetë i akuzuari Nexhat Vllasaliu.
“E nderuara zonja Gjyqtare, nuk ka nevojë me m’sha se s’i kam kurrgjë, kurrfarë haku nuk ua kam”- tha Vllasaliu.
E lidhur me këto deklarime të tij nga ana e palës së dëmtuar kishte reagime.
“Borxh je, shpirtin e ki, o qen… o qen, na ke djegë tanë jetën, jetën na ke djegë…”- ishin reagimet nga ana e palës së dëmtuar.
Propozim për shtyrje të seancës kishte edhe nga përfaqësuesi i palës së dëmtuar, Besnik Berisha, i cili kërkoi nga Gjykata që të ketë në konsideratë ditën e përvjetorit të vrasjes dhe të shtyjë gjykimin për ndonjë datë tjetër.
“Edhe pse jemi të përkushtuar për një gjykim të drejtë dhe në afat sa më të arsyeshëm për secilin të përfshirë në këtë proces, për rrethanat që zonja D.Sh. ia sqaroi Gjykatës… janë rrethana që vlejnë edhe për anëtarët e tjerë të familjes dhe shqyrtimi i sotëm të ndërpritet për të vazhduar për një ditë tjetër, e cila së paku nuk përkon me përvjetorin e vrasjes se Bedriut”- tha Berisha.
Pasi aktakuza u konsiderua e lexuar në fillim të gjykimit, Jeton dhe Nexhat Vllasaliu u deklaruan lidhur me fajësinë për veprat që u vihen në barrë, ani pse nga Jeton Vllasaliu Gjykata kërkoi sqarime lidhur me deklarimin e fajësisë.
“Unë edhe herën e parë jam deklaruar. Unë aktakuzën e pranoj pjesërisht, për disa pika jam i pafajshëm… Unë edhe një herë, po them me përfundimin e dëshmitarëve atëherë flas çka më takon mua, për sot nuk e pranoj…”- tha Jeton Vllasaliu.
I pafajshëm për këtë rast u deklarua edhe Nexhat Vllasaliu
“Nuk e pranoj, se jam i pafajshëm, në asnjë pikë nuk e pranoj”- tha Nexhat Vllasaliu.
Tutje pas deklarimit të palëve për fajësinë u vazhdua me fjalët hyrëse të palëve në procedurë e pas kësaj Gjykata sot kishte paraparë që të dëgjohej në cilësinë e dëshmitarit pala e dëmtuar.
Por pas arsyeve të cekura si më lart Gjykata mori aktvendim për ta shtyrë seancën për datën 26 prill të këtij viti.
Sipas aktakuzës së Prokurorisë, Jeton Vllasaliu dhe Nexhat Vllasaliu në bashkëkryerje dhe me marrëveshje kishin filluar planifikimin për të privuar nga jeta biznesmenin nga Prishtina, Bedri Rexhepin.
E tëra kjo, sipas Prokurorisë, me qëllim të përfitimit të dobisë pasurore.
Tutje sipas aktakuzës, Jeton Vllasaliu më 8 prill të vitit 2021, të dëmtuarin Bedri Rexhepi e dërgon në fshatin Vllasali, në shtëpinë e të pandehurit Nexhat Vllasaliu, ku paraprakisht kishin planifikuar vrasjen e tij.
Gjithnjë sipas aktakuzës, me të arritur te shtëpia e të pandehurit, Jeton Vllasaliu në mënyrë tinëzare e privon nga jeta Bedri Rexhepin duke menduar që ky i fundit ka shumën e caktuar të parave.
Pastaj veturën me të cilën Bedri Rexhepi kishte shkuar deri te shtëpia e të akuzuarve, Jeton Vllasaliu e kishte dërguar veturën e Bedri Rexhepit në arat e fshatit Shushicë-Janjevë, pastaj i pandehuri e kishte thirrur në telefon Nexhat Vllasaliun, i cili i kishte dalë në ndihmë, duke e marrë me veturë të tij personale nga vendi ku Jeton Vllasaliu kishte fshehur veturën e të ndjerit.
E me këtë veprim, sipas dosjes së Prokurorisë, Nexhat Vllasaliu kishte ndihmuar në kryerje e veprës penale.
E me këto veprime të njëjtit akuzohen e kanë kryer veprën penale – vrasje e rëndë si dhe veprën penale – dëmtim i varreve apo kufomave./Kallxo
