Në ditët e para të vendosjes së barrikadave në komunat veriore të Kosovës me paraqitjen e personave me maska dhe grupeve të armatosura serbe, Policia e Kosovës vendosi një pikë kontrolle në magjistralen Zveçan-Leposaviç.
Policia po qëndron këtu 24 orë duke kontrolluar dhe monitoruar lëvizjet e automjeteve në këtë zonë. Ekipi i KosovaNews ka qëndruar në këtë pikë për disa kohë dhe ka parë nga afër kontrollet në këtë pikë. Automjete e dyshimta ndalen nga policët e Njësisë Speciale të Kosovës për tu kontrolluar dhe legjitimuar. Me gjithë tensionet e ditëve të kaluara, me heqjen e barrikadave tani në përgjithësi gjendja këtu duket e qetë.
Sipas burimeve të KosovaNews gjatë periudhës kur i gjithë veriu ishte i bllokuar nga barrikadat kjo pikë policore ishte cak i sulmeve me shok bomba dhe provokimeve të ndryshme nga ana e grupeve kriminale serbe por megjithatë policia e Kosovës nuk është tërhequr asnjëherë nga kjo pikë duke kontrolluar dhe parandaluar edhe kontrabandën me mallra.
Kujtojmë se Presidenti Vuçiç gjatë bisedimeve për heqjen e barrikadave kishte insistuar që për t’u hequr barrikadat duhet të largohen Njësia Speciale e Policisë së Kosovës nga Veriu dhe aty mund të shkojnë vetëm me leje të KFOR-it mirëpo kjo gjë nuk ishte pranuar nga autoritetet e Republikës së Kosovës por edhe ato ndërkombëtare.
