Kryeministri në detyrë, Albin Kurti, ka rikujtuar sot sulmin e ndodhur një vit më parë ndaj akuaduktit të Ibër Lepencit në fshatin Varagë të Zubin Potokut, duke e cilësuar atë si një akt terrorist të drejtuar ndaj infrastrukturës kritike të Republikës së Kosovës.
Sipas Kurtit, sulmi i realizuar rreth orës 19:00 përmes eksplozivit ishte i dyti i rëndë brenda dy viteve ndaj shtetit të Kosovës, pas sulmit paramilitar në Banjskë, dhe kishte për qëllim krijimin e pasojave katastrofike në furnizimin me ujë dhe energji elektrike.
Shpërthimi kishte dëmtuar rëndë fundoren dhe një ballinë të akuaduktit, duke rrezikuar furnizimin me ujë për konsumatorët e sistemit, përfshirë Termocentralin “Kosova B”. Kurti thotë se objektivi i sulmuesve ishte ulja për 60% e kapaciteteve prodhuese të energjisë elektrike, ndërprerja e furnizimit me ujë në Mitrovicë, Skenderaj, Drenas, Vushtrri, Fushë Kosovë dhe gjysmën e Prishtinës, si dhe ndërprerja e shërbimeve të ngrohtores qendrore në kryeqytet.
Ai vlerëson se reagimi i institucioneve ishte i menjëhershëm dhe vendimtar, duke siguruar ruajtjen e rrjedhës së ujit për ftohjen e termoelektranave dhe furnizimin me ujë të pijshëm, pavarësisht dëmeve dhe procesit të riparimit.
Ndërkohë, rindërtimi i akuaduktit u përfundua brenda vetëm një muaji, ndërsa sistemi u rikthye në kapacitet të plotë operativ. Kurti thotë se ky reagim dëshmoi profesionalizmin e ndërmarrjeve publike dhe institucioneve shtetërore, duke theksuar se “Shteti dhe Republika triumfuan përballë grupeve ekstremiste dhe terroriste”.
Kryeministri në detyrë ka rikujtuar edhe gjetjet e bastisjeve në veri pas sulmit, ku u konfiskuan armë, pajisje, uniforma dhe emblema ruse e serbe, të cilat ai i cilëson si dëshmi për përfshirjen e grupeve ekstremiste serbo-ruse me mbështetje nga Beogradi dhe frymëzim nga Rusia.
“Sot, ato janë prova të qarta për synimin e tyre për destabilizimin e vendit tonë dhe krijimin e një mjedisi të pasigurt në rajon”, përmbyll Kurti.
