Në Stamboll është hapur një hetim lidhur me vdekjen e shtetasit britanik me origjinë shqiptare, Mentor Rama, i cili ndërroi jetë pasi iu nënshtrua një ndërhyrjeje për transplant flokësh dhe trajtimi dentar.
Ngjarja ndodhi më 11 nëntor në rajonin e Şişli-t, një nga qendrat më të frekuentuara dhe komerciale të Stambollit. Mentor Rama kishte mbërritur në Turqi javën e kaluar për t’iu nënshtruar procesit të transplantit të flokëve në një klinikë në Fulya, zonë e njohur për spitalet dhe klinikat private të kujdesit shëndetësor. Një ditë më pas, ai kishte kryer edhe trajtim dentar në Ayazağa, një lagje tjetër e Stambollit e njohur për qendrat moderne mjekësore dhe bizneset.
Pas ndërhyrjeve, Rama ishte kthyer në hotelin ku po qëndronte, por më pas është ndjerë keq. Stafi i hotelit ka njoftuar ekipet mjekësore, të cilat e kanë transportuar menjëherë në Spitalin e Arsimit dhe Kërkimeve “Seyrantepe Hamidiye Etfal”. Megjithë përpjekjet e mjekëve, ai ka ndërruar jetë rreth orës 16:30 të datës 11 nëntor.
Trupi i tij është dërguar në Institutin e Mjekësisë Ligjore për autopsi, ndërsa pas përfundimit të procedurave, është dorëzuar familjes për t’u transportuar në vendlindje.
Autoritetet turke kanë nisur një hetim për të sqaruar rrethanat e vdekjes së tij.
