Prindërit e nxënësve të një klase në shkollën fillore “Dardania” në Prishtinë, kanë vendosur të mos i dërgojnë fëmijët në shkollë nga e hëna për shkak të orarit, siç e kanë vlerësuar ata, të papërshtatshëm.
Një ditë më parë, kjo shkollë fillore në një njoftim në Facebook publikoi orarin e ri teksa njoftoi se është rinovuar aneksi dhe nxënësit do të zhvillojnë mësimin vetëm në ambientet e kësaj shkolle. Deri tash, një pjesë e nxënësve mbante mësimin në shkollën “Xhemail Mustafa”.
Siç ka njoftuar të shkolla shtunën, së shpejti në të do të nisë renovimi i plotë.
Në njoftim shkolla ka publikuar edhe orarin, që parasheh që klasat e dyta dhe të treta të nisin mësimin në orën 15:00. Megjithatë, të dielën, në një komunikatë për media, prindërit e klasës II/4 kanë dalë kundër orarit nga 15 – 18:25. Sipas tyre, orari çrregullon tërësisht dinamikën e fëmijëve.
“Shumë prej nesh, si prindër që punojnë, i dërgojmë fëmijët në qëndrim ditor nga ora 07:30 e mëngjesit, dhe ky orar i ri do të thotë se ne mund t’i marrim fëmijët vetëm rreth orës 19:00 pasdite. Është shkencërisht e vërtetuar se orare të tilla nuk janë efektive për fëmijët, pasi çrregullojnë procesin e mësimnxënies”, thuhet në një njoftim nga prindërit e nxënësve të kësaj klase.
Sipas prindërve, “ky orar për nxënës të moshës 7-8 vjeç nuk e merr parasysh interesin më të mirë të fëmijëve tanë”.
“Ndërsa një orar i tillë mund të jetë i pranueshëm në situata të jashtëzakonshme, Kosova dhe sistemi ynë arsimor nuk po kalojnë nëpër ndonjë periudhë të tillë. Prandaj, ne, prindërit e nxënësve të klasës II/4, kemi vendosur unanimisht të bojkotojmë procesin mësimor nga e Hëna date 16.09.2024, deri sa të na ofrohet një orar më i përshtatshëm për fëmijët tanë”, thuhet në reagim.
