Në Pallatin e Kongreseve në Tiranë kanë nisur sot në orën 08:30 homazhet në nder të ish-kryeministrit Fatos Nano, i cili ndërroi jetë më 31 tetor në moshën 73-vjeçare. Arkëmorti i mbështjellë me flamurin kombëtar është vendosur në hollin kryesor, ku me qindra qytetarë kanë ardhur për t’i dhënë lamtumirën e fundit.
Ndër të parët që kryen homazhe ishin deputeti socialist Taulant Balla, ish-deputeti Gramoz Ruçi, si dhe përfaqësues të shumtë të Partisë Socialiste. Ruçi e cilësoi Nanon si “njeriun e parë që sakrifikoi pushtetin për të bërë shtet”. I përlotur u pa edhe deputeti Erion Braçe, i cili u përkul para arkëmortit të liderit historik të së majtës.
Në homazhe kanë marrë pjesë edhe figura nga opozita, përfshirë Lulzim Bashën, Fatmir Mediun, Agron Dukën dhe Arjan Ndojën, si dhe shumë qytetarë nga rrethe të ndryshme të vendit.
Sipas njoftimit zyrtar, homazhet publike zhvillohen deri në orën 11:00, pasuar nga nderimet shtetërore deri në 11:45, ndërsa në 12:05 do të mbahet ceremonia funebre shtetërore e lamtumirës.
Në ceremoni pritet të mbajnë fjalë kryeministri Edi Rama dhe bashkëshortja e Nanos, Xhoana Nano.
Në nderim të Fatos Nanos, e diela është shpallur ditë zie kombëtare, ndërsa në orën 12:00 do të mbahet një minutë heshtje në mbarë vendin.
Për homazhe nga Kosova pritet të vijë kryeministri Albin Kurti me disa anëtarë të qeverisë dhe deputetë, ndërsa nga Maqedonia e Veriut do të marrë pjesë Ali Ahmeti, dhe nga Mali i Zi, zëvendëskryeministri i vendit.
Fatos Nano do të prehet në varrezat e Sharrës, ndërsa familja ka kërkuar privatësi gjatë ceremonisë së varrimit.
