Dhjetëra qytetarë serbë janë mbledhur në oborrin e Manastirit të Graçanicës, për të festuar Ditën e Vidovdanit, e cila festohet për çdo vit, për çdo 28 qershor.
Të pranishëm atje janë edhe pjesëtarët e KFOR-it, EULEX-it dhe Policisë së Kosovës.
Disa prej serbëve që janë duke e festuar Vidovdanin kanë veshur bluza me hartën e Kosovës në të cilën ndër të tjera shkruan “Nuk e jap”.
Gjithashtu në qendër të hartës së Kosovës shihet një kryq ku në çirilicë shkruan “rrënjët e mija”.
“Frikohuni qen”, “Bijtë serbë” e “Zoti me ne” janë tri nga citatet tjera të shkruara në këto bluza.
Ndër vite, Vidovdani është organizuar më 28 qershor në Gazimestan.
Por javën që shkoj dioqeza e Rashkë-Prizrenit ka vendosur që sivjet manifestimi i Vidovdanit të organizohet në Manastirin e Graçanicës dhe jo në Gazimestan, siç bëhej deri tash. Kjo dioqezë ka arsyetuar vendimin me “situatën aktuale të sigurisë”. Gjithashtu ka bërë të ditur se do të kërkojë mbrojtje nga KFOR-i, sepse “nuk i beson Policisë së Kosovës”.
Ndërkohë të martën Policia e Kosovës ka njoftuar se ka shtuar masat e sigurisë për festën e Kurban Bajramit dhe Vidovdanit, ndërsa ka publikuar një varg masash që këto festa të shënohen pa incidente.
Policia ka njoftuar se një nga masat është edhe mbyllja e hyrje daljeve në qytetin e Graçanicës.
“Festa e Vidovdanit mbahet në Graçanicë duke filluar nga ora (07:00), andaj do të ndërpritet përkohësisht qarkullimi i automjeteve në hyrje-daljet e komunës së Graçanicës, konkretisht në hyrje të fshatit Mramor dhe nga ana tjetër në hyrje të lagjes Veterniku, ku automjetet do të riorientohen në rrugë alternative deri në përfundim të festës së Vidovdanit”, thuhej në njoftimin e Policisë.
Ndërkaq, një ditë më parë, qytetarët serbë u mblodhën në Mitrovicë të Veriut dhe në Graçanicë për të shënuar festën e Vidovdanit. Aty u prezantua një dokument i quajtur “Deklarata e Vidovdanit”.
Në deklaratë thuhet se komuniteti serb në Kosovë është “i ekspozuar ndaj dhunës”.
“Ka ardhur koha – “ose Asociacioni ose serbët do të dinë çfarë do të bëjnë”, u tha gjatë leximit të deklaratës.
Nga Beogradi, që nga java e kaluar është paralajmëruar miratimi i deklaratës së serbëve nga Kosova. Në ndërkohë, edhe presidenti i Serbisë Aleksandar Vuçiq kishte konfirmuar se serbët do të ndërmarrin “hapa aktivë për Vidovdan, pa specifikuar se çfarë do të jenë, por me shënimin se “në Vidovdan mund të dihet gjithçka”.
Teksti i këtij dokumenti, që përmban pesë pika, ku në të fundit thuhet se “në Vidovdan shihet gjithçka”, është lexuar nga ish-kryetari i komunës së Zveçanit, Dragisha Milloviq.
Kisha Ortodokse Serbe feston këtë datë në përkujtim të serbëve në betejën kundër ushtrisë së Perandorisë Osmane në Kosovë, në vitin 1389.
Në Gazimestan, në këtë ditë të qershorit të vitit 1989, ishte fjalimi i ish-presidentit serb, Sllobodan Millosheviq i cili u konsiderua si një paralajmërim i luftërave që do të vijonin me fillimin e viteve të 90-ta.
Në të njëjtën datë, disa vite më vonë, përkatësisht në vitin 2001, Millosheviqi u ekstradua në Tribunalin e Hagës për krimet e luftës në ish-Jugosllavi, për të cilat u akuzua.
