Ambasada e Gjermanisë në Kosovë ka shprehur sërish shqetësimin e saj lidhur me vonesat e vazhdueshme në konstituimin e Kuvendit të Kosovës dhe në formimin e një qeverie funksionale dhe stabile.
“Vonimi në konstituimin e Kuvendit dhe formimin e një qeverie stabile që është në gjendje të marrë vendime, është një shqetësim gjithnjë në rritje,” thuhet në një deklaratë nga Ambasada.
Në këtë deklaratë theksohet se ky shqetësim është ngritur vazhdimisht nga ambasadori gjerman, përfshirë edhe në një takim të fundit që zëvendës-shefi i misionit gjerman, Matthias Conrad, kishte me kryeministrin në detyrë Albin Kurti, së bashku me përfaqësues të vendeve të Quint-it.
“Qytetarët meritojnë politikanë që vënë përpara interesin e vendit dhe mirëqenien e tij, përpara interesave partiake. Por ajo që shohim më së shumti është sjellje bllokuese dhe vonesa,” theksohet më tej në reagim.
Ambasada ka bërë të ditur gjithashtu se këto shqetësime janë diskutuar edhe me presidenten Vjosa Osmani gjatë një takimi që ishte mbajtur dy javë më parë.
“Shumë detyra të rëndësishme vendore dhe ndërkombëtare janë në pritje,” thuhet në fund të deklaratës.
Ndërkohë, për të pesëmbëdhjetën herë me radhë, deputetët e Kuvendit të Kosovës kanë dështuar të konstituojnë organin ligjvënës. Për të shtatën herë rresht, ata refuzuan të formojnë një komision për mbikëqyrjen e një votimi të fshehtë për zgjedhjen e kryetarit të ri të Kuvendit – sipas një propozimi të bërë më 1 maj nga kryesuesi i seancës, Avni Dehari, pasi kandidatja e Lëvizjes Vetëvendosje, Albulena Haxhiu, nuk arriti të sigurojë 61 votat e nevojshme në disa raunde votimi.
