Duke nisur nga 12 maji [sot], euro do të jetë valuta e vetme për transaksione në Kosovë, pasi periudha transitore e Bankës Qendrore të Kosovës (BQK) ka përfunduar.
Gjatë kësaj periudhe janë ofruar informacione për qytetarët rreth zbatimit të Rregullores për pagesa me para të gatshme. Nga tash, sipas Rregullores, do të ketë masa ndëshkuese.
Bankat komerciale që operojnë në Kosovë janë udhëzuar që të hapin degë të reja në veri.
“Valutat tjera jo euro mund të përdoren në Republikën e Kosovës si vlera për ruajtje në formë fizike apo në llogaritë bankare në valuta jo euro, për kryerjen e pagesave ndërkombëtare në valuta jo euro dhe për aktivitetet e këmbimit valutor”, citohet në Rregulloren e BQK-së.
Ditë më parë, kryeministri Albin Kurti i pyetur se çfarë do të ndodhë pas përfundimit të fazës transitore, ka thënë se “ajo që vendos është BQK-ja, e jo ekzekutivi”.
Më 1 shkurt ka hyrë në fuqi Rregullorja e re e Bankës Qendrore të Kosovës, që parasheh euron si valutën e vetme për kryerjen e pagesave.
Komuniteti ndërkombëtar i ka kërkuar Kosovës që të shtyjë zbatimin e Rregullores, me qëllim që të gjendet një zgjidhje për popullsinë në veri të Kosovës – të banuar me shumicë serbe – që preket nga vendimi.
Serbët në Kosovë, për vite të tëra, pranojnë pagesa me dinarë nga buxheti i Serbisë.
Por as pas gjashtë takimeve në Bruksel nuk u arrit ndonjë marrëveshje. Më 13 maj [nesër] do të zhvillohet takimi i shtatë mes delegacionit të Kosovës dhe Serbisë për këtë çështje.
