Në një aksion të gjerë të Inspektoratit Policor të Kosovës dhe Prokurorisë së Prizrenit është arrestuar edhe ish-drejtori rajonal i Policisë në Prizren, Nexhmi Krasniqi.
Mësohet se Krasniqi është arrestuar për veprën penale të detyrimit. E gjithë ngjarja dyshohet se lidhet me një pronë për të cilën janë dhënë mijëra euro në formë të detyrimit. Perveç Krasniqit janë edhe tre persona të tjerë të dyshuar. Prokuroria ka njoftuar se katër persona janë arresuar më 04.08.2025 në Prizren nën dyshimin për përfshirje në veprat penale të detyrimit dhe shmangies nga tatimi. Sipas njoftimit, në mesin e personave të arrestuar është edhe një zyrtar i lartë policor me gradën kolonel. “IPK, si pjesë e procedurës administrative ka rekomanduar suspendimin e kolonelit policor”- thuhet në njoftim. Ndërsa është bërë e ditur se aksioni i koordinuar mes Prokurorisë Themelore në Prizren, në bashkëpunim të ngushtë me Inspektoratin Policor të Kosovës (IPK), ka rezultuar me bastisjen e katër lokacioneve në Prizren dhe arrestimin e katër personave të dyshuar.
