Federata Serbe e Futbollit ka zyrtarizuar stadiumin ku do të zhvillohet ndeshja ndërmjet Serbisë dhe Shqipërisë, e cila do të luhet më 11 tetor në kuadër të kualifikueseve për Kupën e Botës “SHBA-Meksikë-Kanada 2026”.
Sipas njoftimit zyrtar, përballja do të zhvillohet në stadiumin “Rajko Mitić” në Beograd, impiantin më të madh në Serbi me kapacitet prej 51,755 vendesh.
Stadiumi është ndërtuar në periudhën 1960–1963 dhe është hapur zyrtarisht më 1 shtator 1963, ndërsa një rinovim i madh iu bë në vitin 2017.
Ndryshe nga viti 2014, kur ndeshja e shumëpërfolur Serbi – Shqipëri u luajt në stadiumin e Partizanit dhe u shoqërua me incidente, këtë herë është zgjedhur një stadium më modern dhe me kapacitet më të madh, në përpjekje për të siguruar kushte më të mira sportive dhe organizative.
Sipas Federatës Serbe, vendimi për stadiumin u mor pas analizash të shumta dhe në konsultim me UEFA-n.
Njoftimi i plotë i Federatës Serbe të Futbollit:
“Ndeshjet kualifikuese të ekipit kombëtar serb kundër Anglisë më 9 shtator dhe Shqipërisë më 11 tetor do të luhen në stadiumin “Rajko Mitić” në Beograd, ndërsa ndeshja në shtëpi e raundit të fundit kundër Letonisë është zgjedhur në stadiumin “Dubocica” në Leskovac”.
“Pas një analize të hollësishme, e cila, përveç aspektit sportiv, segmentit organizativ dhe të sigurisë, përfshinte edhe konsultime me UEFA-n, u arrit në përfundimin se stadiumi “Rajko Mitić”, si objekti më i madh i futbollit në vend, do t’i ofrojë ekipit tonë kombëtar kushte optimale për zhvillimin e ndeshjeve me rëndësi të lartë”.
“Federata e Futbollit e Serbisë dëshiron të shfrytëzojë këtë mundësi për të falënderuar të gjithë tifozët për mbështetjen e tyre gjatë gjithë ciklit të Ligës së Kombeve, si dhe në ndeshjen kundër Andorrës. Ju ftojmë të mbushni tribunat e stadiumit tonë më të madh dhe të ndihmoni “Shqiponjat” në ndeshjet kyçe për kualifikim për Kupën e Botës 2026 në Shtetet e Bashkuara, Meksikë dhe Kanada”.
“Shpresojmë sinqerisht që në stadiumin “Dubocica” në Leskovac, ku trajneri Stojkoviq dhe lojtarët e tij ndihen si në shtëpi, të gjithë do të kemi shumë arsye për gëzim dhe kënaqësi pas ndeshjes kundër Letonisë, e cila është planifikuar për më 16 nëntor”, thuhet në njoftim.
