Ndeshja më interesante, që do t’i lërë në hije të gjitha përballjet e tjera në xhiron gjashtë të kampionatit francez, është klasikja mes PSG-së dhe Marseillet. Me këtë derbi edhe do të mbyllet kjo xhiro, pasi luhet të dielën prej orës 20:45 në Paris. PSG-ja ka synim të kthehet te fitorja në këtë duel duke pasur parasysh se xhiron e shkuar u mposht 3:2 nga Nice.
Në anën tjetër, edhe Marseille do të udhëtojë drejt Parisit për fitore pasi luajti pa gola vikendin e shkuar me Toulousen. Për dallim prej Parisit që ka 8 pikë, Marseille ka tubuar 9 pikë deri më tani dhe ende nuk di për humbje këtë edicion. Ka dy fitore karshi tri barazimeve dhe do të përpiqet ta mbajë këtë seri pozitive edhe pas derbit me Parisin.
Megjithatë, Marseille do të jetë pa trajnerin Marcelinho, i cili ditë më parë dha dorëheqje shkaku i presionit të tifozëve dhe përplasjes me kryesinë e klubit.
Te PSG-ja do të mbështeten te sulmuesi Kylian Mbappe ndaj Marseillet, i cili ka treguar formë të mirë këtë edicion. Në katër ndeshje të luajtura deri më tani në kampionat, Mbappe ka shënuar 7 gola dhe mbetet rreziku kryesor për portën e Marseillet, që synon ta evitojë humbjen në këtë derbi.
