Nxënësi Zejn Zejnullahu, i cili më herët ishte raportuar i zhdukur dhe më pas u gjet në lumin e Gadimes, fatkeqësisht ka ndërruar jetë.
Lajmi është konfirmuar nga të afërmit dhe personat që i dolën në ndihmë.
“Pas një përpjekjeje të madhe nga ne, vendasit dhe ekipet mjekësore, nxënësi ynë, Zejna, nuk arriti të mbijetojë. Lusim Zotin e Madh të mos ketë raste të tilla. Ngushëllime familjes”, ka shkruar Driton Shabiu.
Gjendja shëndetësore e Zejnës në momentin e gjetjes ka qenë e rëndë. Burime të IndeksOnline bëjnë të ditur se, pas nxjerrjes nga lumi, është vërejtur se fëmija kishte puls dhe menjëherë i është dhënë ndihma e parë.
“Pas ndihmës së parë, pamë se një sasi e madhe e ujit i doli nga goja”, ka deklaruar një dëshmitar nga vendi i ngjarjes.
Nxënësi është dërguar me urgjencë për trajtim mjekësor në Qendrën Klinike Universitare të Kosovës (QKUK). Me t’u pranuar në Shërbimin Emergjent, ekipet mjekësore kanë nisur reanimimin.
Për fat të keq, pavarësisht përpjekjeve, ai nuk arriti t’i mbijetojë.
Zejn Zejnullahu raportohet se ishte zhdukur pas përfundimit të procesit mësimor gjatë ditës së sotme.
