Seanca fillestare e rigjykimit për rastin e njohur si “53 milionëshi” është ndërprerë sot në Gjykatën Themelore të Prishtinës, pasi mbrojtja e njërit nga të dyshuarit ka kërkuar largimin e kryetares së trupit gjykues.
Në këtë proces gjyqësor, ish-ministri i Infrastrukturës, Pal Lekaj, akuzohet për keqpërdorim të pozitës apo autoritetit zyrtar, në lidhje me pagesën e shumëpërfolur prej 53 milionë euro ndaj kompanisë “Bechtel-Enka”. Së bashku me të, të akuzuar në këtë rast janë edhe zyrtarët Nebih Shatri dhe Besim Tahiri, si dhe ish-këshilltari politik i Lekajt, Eset Berisha.
E avokatja e këtij të fundit, Teutë Xhema, kërkoi përjashtimin e gjyqtares Violeta Namani nga drejtimi i këtij rasti, për siç tha “dyshimit për mungesë të paanshmërisë” dhe “shtrembërim të provave materiale dhe personale”.
Pas kësaj kërkese, kryetarja e trupit gjykues u tërhoq për konsultime me dy anëtarët e tjerë të trupit, Valon Kurtaj dhe Rrahman Beqiri, dhe më pas vendosi që seanca të ndërpritet.
Gjykata do të njoftojë palët në ditët në vijim për vendimin lidhur me kërkesën për përjashtim të gjyqtares dhe për hapat e mëtejshëm në këtë proces.
Rasti i njohur si “53-milionëshi”, ku ish-ministri i Infrastrukturës, Pal Lekaj, dhe tre zyrtarë të tjerë të kësaj ministrie ishin shpallur fajtorë në shkallën e parë, është rikthyer për rigjykim në Gjykatën Themelore të Prishtinës.
Kjo pason vendimin e Gjykatës së Apelit, e cila në muajin shkurt të këtij viti e anuloi aktgjykimin dënues, duke konstatuar se gjatë shqyrtimit paraprak janë bërë gabime procedurale dhe ka pasur vlerësim të pasaktë të provave. Si rezultat, rasti do të trajtohet nga e para në një proces të ri gjyqësor.
