NATO-ja do t`i japë Ukrainës mbrojtje ajrore më të avancuar pas thirrjeve urgjente të Kievit dhe sulmeve vdekjeprurëse ruse, ka thënë kreu i Aleancës Veriatlantike, Jens Stoltenberg.
Komentet e sekretarit gjeneral te NATO-s, Jens Stoltenbrg, vijnë pas një samiti të krizës NATO-Ukrainë të premten.
Duke folur pas samitit të Këshillit NATO-Ukrainë të mbajtur me lidhje video, Stoltenberg tha: “Ministrat e mbrojtjes të NATO-s kanë rënë dakord të rriten dhe të ofrojnë mbështetje të mëtejshme ushtarake, duke përfshirë më shumë mbrojtje ajrore”.
Ai tha se blloku prej 32 anëtarësh “ka përcaktuar aftësitë ekzistuese në të gjithë aleancën dhe se ka sisteme që mund të vihen në dispozicion të Ukrainës”.
Presidenti ukrainas, Volodymyr Zelensky, tha se Kievit i duheshin “shtatë apo më shumë Patriotë ose sisteme të ngjashme të mbrojtjes ajrore” për të mbrojtur qytetet e vendit.
Shefi i NATO-s tha se kishte Patriot dhe sisteme të tjera të avancuara të mbrojtjes ajrore të disponueshme në rezervat e vendeve të NATO-s që mund t’i jepeshin Ukrainës – por ai nuk dha detaje se çfarë saktësisht mund të marrë Kievi.
E pas muajsh vonese, Kongresi Amerikan shkoi një hap më pranë miratimit të një projektligji ndihme prej 60.8 miliardë dollarësh (49 miliardë £) për Ukrainën.
Javën e kaluar, Gjermania u zotua të furnizojë Kievin me një bateri të tretë Patriot të prodhuar nga SHBA nga rezervat e saj ushtarake.
Ukraina aktualisht ka disa sisteme Patriot, por jo të mjaftueshme për të mbrojtur qytetet e saj nga sulmet masive ruse.
Ukraina është në mënyrë kritike e varur nga furnizimet e avancuara të armatimit nga aleatët e saj perëndimorë, veçanërisht nga SHBA, për të qenë në gjendje të vazhdojë të luftojë Rusinë – një forcë shumë më e madhe ushtarake me një bollëk municionesh artilerie.
