Ministrja e Arsimit, Shkencës Teknologjisë dhe Inovacionit, Arbërie Nagavci dhe ministri i Shëndetësisë, Arben Vitia vizituan edicionin VI-të të Panairit të Shkencës dhe Kulturës, që u mbajt në gjimnazin “Xhevdet Doda”, në Prishtinë.
Ky panair mblodhi bashkë nxënës, mësimdhënës dhe përfaqësues institucional për të festuar kreativitetin dhe njohuritë në fusha të ndryshme, një ngjarje e rëndësishme që tashmë është bërë pjesë tradicionale e kalendarit arsimor dhe kulturor të shkollës.
Ministrja e Arsimit, Shkencës, Teknologjisë dhe Inovacionit, Arbërie Nagavci, si dhe ministri i Shëndetësisë, Arben Vitia, shprehën mbështetjen e tyre për këtë aktivitet të rëndësishëm, si dhe patën mundësinë të shohin nga afër punimet dhe prezantimet e nxënësve, që përfshinin tema nga shkenca, teknologjia, arti dhe kultura.
Ministrja Nagavci, përgëzoi nxënësit dhe mësimdhënësit për përkushtimin dhe organizimin e këtij panairi. Ajo theksoi rëndësinë e nismave të tilla për nxitjen e inovacionit dhe përkrahjen e talenteve të reja në arsimin parauniversitar.
Ndërsa, ministri Vitia vlerësoi lart rolin që ka shkenca dhe inovacioni në përparimin e sistemit arsimor dhe shëndetësor. Ai uroi organizatorët dhe pjesëmarrësit për suksesin e këtij panairi, duke theksuar se aktivitete të tilla forcojnë lidhjen ndërmjet dijes dhe zhvillimit shoqëror.
