Ministrja e Arsimit, Arbërie Nagavci, ka thënë se në shkollat e Kosovës edukimi medial është i përfshirë në lëndët me zgjedhje.
Sipas saj, aktualisht në një numër jo të madh të shkollave kjo lëndë është propozuar e pastaj është marrë miratim për futjen e kësaj lënde.
“Është e ditur tashmë që është shumë e rëndësishme që të avancojmë në raport të ofrimit të njohurive për edukimin medial. Me informatat e shumta, jo të gjitha të konfirmuara, edukimi medial është shumë i rëndësishëm. Edhe te ne, edukimi medial, është i shtrirë te lëndët tjera. Ka lëndë të ndryshme ku ka njësi specifike që adresojnë çështjen e edukimit medial. Me zhvillimet dhe ndikimin aq të madh të mediave, sigurisht se me të drejtë, shkollat dhe drejtoritë komunale e kanë parë të arsyeshme futjen në mësimin me zgjedhje”, ka thënë ajo.
Nagavci për emisionin “Edumedia” ka thënë se ofrimi i një lënde të veçantë ka shumë diskutime, sepse ka shumë kërkesa për lëndë specifike.
Sipas saj, ekziston frika se nëse ofrohet si një lëndë e veçantë, mund të mos arrijë që të përfshihet apo të arrihet një balancë me gjitha nevojat për lëndët ekzistuese apo ato tjerat që paraqiten si domosdoshmëri.
Ajo ka thënë se nëse ofrohet si lëndë me zgjedhje mund të arrihet një rezultat.
“Nëpërmes qasjes korrikulare ne sigurohemi që të adresohen temat më të rëndësishme. Te mësimi me zgjedhje është në diskrecion të mësimdhënësit që të projektojnë lëndën. Po në këtë linjë, në kuadër të komponentes së digjitalizimit është paraparë ofrimi i materialeve për mësimdhënësit, kur është e nevojshme”, ka thënë ajo.
Nagavci ka thënë se është thelbësore që Kosova të avancojë në kontekstin e edukimit mediatik.
Sipas saj, media ka një rol padiskutim madhor në Kosovë, prandaj arsimimi i mirëfilltë mediatik është vendimtar për shoqërinë e saj.
“Arsimimi mediatik është përfshirë në një draft strategji pesëvjeçare si pjesë e dixhitalizimit, e cila përfshin gjithashtu ndërtimin e kompetencave për edukatorët, mësuesit dhe përdorimin e përmbajtjes dixhitale në sektorin e arsimit. Drafti i Planit Strategjik për Arsimin, me dixhitalizimin në themel të tij, është në fazën e konsultimeve publike. Mësimi mediatik ka shumë të ngjarë të jetë pjesë e lëndëve zgjedhore dhe një aspekt i integruar në procesin e dixhitalizimit të arsimit”, ka thënë ajo.
Ka shumë kërkesa të ndryshme nga edukatorët dhe grupet e tjera për lëndë të veçanta shkollore, dhe sipas Nagavcit, futja e shkrim-leximit mediatik si lëndë specifike mund të rrezikojë balancimin e nevojave në lëndët ekzistuese shkollore.
Rezultati më i mirë sipas saj është të arrihet kur kombinohet lënda zgjedhore për të cilën shkollat kanë shprehur interes, aktivitetet jashtëshkollore dhe integrimi i ML si koncept në pjesë të ndryshme të kurrikulës.
“Në kuadër të planit strategjik të arsimit, ne kemi paraparë edhe përgatitjen e njësive mësimore dhe materialeve lehtë të qasshme për mësimdhënësit”, ka thënë ajo./koha.net/
