Sot u shënua 53-vjetori i themelimit të Universitetit të Prishtinës “Hasan Prishtina”, institucion i dijes dhe rezistencës e dikur ishte sinonim i lëvizjes kombëtare për lirinë dhe Pavarësinë e Kosovës.
Ministrja e Arsimit, Arbërie Nagavci, u shpreh se Universiteti i Prishtinës është sinonim i dijes, shkencës dhe inovacionit.
Nagavci tutje tha se misioni më i rëndësishëm për këtë institucion është përgatitja e gjeneratave të reja për të ardhmen e Kosovës. Andaj, cilësia akademike që ofron UP-ja është përcaktuese e zhvillimit të shtetit tonë.
“Së bashku do të vazhdojmë angazhimin drejt arritjes së qëllimeve tona, në ndjekjen e ritmit të zhvillimeve bashkëkohore dhe ndërkombëtarizimin e dijes dhe shkencës”, u shpreh ministrja Nagavci.
Gjatë kësaj ceremonie ku merrnin pjesë rektorë nga vendet e rajonit por edhe studentë të UP-së, u ndan edhe mirënjohje për studentët e dalluar.
