Analisti për siguri, Agim Musliu, nëpërmjet një postimi në profilin e tij në Facebook, ka reaguar ashpër ndaj zhvillimeve që lidhen me Aleksandar Arsenijeviqin – një emër i njohur në opinion si “aktivist civil” në veri të Kosovës, por që tanimë po del të ketë qenë pjesë e strukturave që veprojnë në shërbim të agjendave të Beogradit.
“Kur një ‘aktivist civil’ përfundon me banesë dhuratë nga krimi i organizuar dhe mbështetje nga struktura ilegale, nuk kemi të bëjmë me aktivizëm, por me infiltrime të qëllimshme për destabilizim të shtetit të Kosovës”, ka thënë Musliu.
Sipas informacioneve të sigurisë, Arsenijeviqi, pas arratisjes së tij në Serbi, është strehuar në një banesë në qytetin Vrnjaçka Banja, e cila i është dhuruar nga Millan Radoiçiqi – figurë kyçe e krimit të organizuar dhe e lidhur me strukturat ilegale në veri të Kosovës. Kjo banesë konsiderohet një shpërblim për detyrat e kryera me sukses, në funksion të destabilizimit të situatës në Kosovë.
Edhe pse për një kohë të gjatë u paraqit si “opozitar” i Listës Serbe dhe aktivist i shoqërisë civile, në prapaskenë Arsenijeviqi luajti rol të drejtpërdrejtë në përpjekjet për destabilizim të veriut të Kosovës dhe minimin e autoritetit të institucioneve të Republikës së Kosovës. Burime të afërta konfirmojnë se edhe aktualisht ai mbështetet financiarisht nga rrjete të jashtëligjshme që operojnë në këtë pjesë të vendit.
Në muajin qershor, Policia e Kosovës bastisi vilën e tij në fshatin Vallaq, ku u zbulua një arsenal i tërë armësh dhe pajisjesh ushtarake. Kjo vilë ishte ndërtuar nga kompania RAD 028, e cila gjendet në listën e zezë të SHBA-së. Zyrtarisht menaxhohet nga Radulle Steviq, por kontrollohet nga vetë Millan Radoiçiqi. Vila ishte më herët përdorur nga grupet ilegale “Mbrojtja Civile” dhe “Severna Brigada” për vëzhgim dhe ndjekje të lëvizjeve të Policisë së Kosovës dhe KFOR-it.
Ky rast hedh dritë mbi mënyrën se si Serbia, përmes figurave të infiltruar dhe të paraqitur si “aktivistë”, përpiqet të realizojë operacione destabilizuese në veri të Kosovës, duke i vënë në shërbim të propagandës dhe veprimeve ilegale kundër sovranitetit të Republikës së Kosovës.
