Anëtari i Këshillit të Përgjithshëm të Lidhjes Demokratike të Kosovës (LDK), Valon Murtezaj, ka shprehur publikisht pakënaqësinë e tij të thellë ndaj mënyrës së funksionimit të lidershipit aktual të kësaj partie, transmeton KosovaNews.
Përmes një reagimi të publikuar në rrjetet sociale, Murtezaj ka protestuar ndaj, siç i quan ai, “metodave të punës të instaluara në majën e vendimmarrjes në LDK”, duke kritikuar mungesën e konsultimeve me organet statutare të partisë për agjendën politike të paralajmëruar për prezantim.
“Prezantimi i paralajmëruar për nesër i një agjende lidhur me një orientim qeverisës, pa asnjë konsultim dhe pa asnjë miratim të organeve statutare partiake, shënon pikën më të ulët të demokracisë në subjektin politik të Lidhjes Demokratike të Kosovës”, shkruan Murtezaj.
Ai nënvizon se vendimmarrja për orientimin politik të partisë është kompetencë ekskluzive e Këshillit të Përgjithshëm të LDK-së dhe duhet të ndërtohet përmes konsultimeve të gjëra.
Në reagimin e tij, Murtezaj ironizon edhe me ndryshimet e shpeshta në emërtimet e opsioneve qeverisëse që, sipas tij, flasin për mungesë serioziteti:
“Qeveri Nacionale e Tranzicionit, Qeveri Nacionale Kalimtare, Qeveri Gjithpërfshirëse Kalimtare, Qeveri Gjithpërfshirëse e Unitetit, Qeveri e Unitetit, Qeveri e Unitetit Kombëtar…”
Murtezaj e quan të pafalshme braktisjen e demokracisë nga një parti që, sipas tij, ka qenë shembull i saj në rajon, duke përkujtuar figurat historike të saj dhe trashëgiminë e presidentit historik Ibrahim Rugova.
“LDK-ja e Ibrahim Rugovës, e demokracisë së parë në këtë rajon, e heronjve të lirisë, e heronjve të demokracisë, e patriotëve për Kosovën, nuk duhet ta braktisë demokracinë.
Partia politike nuk është kompani ndërtimore. Partia politike është organizatë shtet-ndërtimore. Autokracia dhe oligarkia në LDK nuk kanë vend dhe nuk do të kenë,” përfundon Murtezaj, duke theksuar se do të qëndrojë gjithmonë në anën e demokracisë.
